دارحان تولەگەنوۆتىڭ «اعايىندىلار» اتتى دەبيۋتتىك كارتيناسى نەمىستىڭ ولدەنبۋرگتەگى بەدەلدى كينوفورۋمىندا «Spirit of Cinema» ارنايى جۇلدەسىن جەڭىپ الدى.
ايتا كەتەيىك، فيلم ەۋروپالىق «ساندەنس» دەپ اتالىپ كەتكەن الەمدەگى جەتەكشى فەستيۆالدە ۇسىنىلعان العاشقى قازاقستاندىق تاسپا بولدى. كارتينادا بالالار ءۇيىنىڭ تۇلەگى ءومىرىنىڭ درامالىق تاريحى باياندالادى. كەيىن ول ءىنىسىن كەزدەستىرەدى. ودان كەيىن اعايىندىلار وتباسىن تابۋعا ۇمىتتەنىپ، اكەسىن ىزدەي باستايدى.
«بۇل فيلم تۋىسقاندىق قارىم-قاتىناس، ماحاببات تۋرالى. وسىنى نەگىزگە الا وتىرىپ، مەن ءبىر-بىرىن مۇلدەم بىلمەي وسكەن ەكى ادامنىڭ قاندىق بايلانىسىنىڭ مىقتىلىعىن كورسەتكىم كەلدى. مەن باۋىرلاستىق تاقىرىبىن كوبىرەك زەرتتەگىم كەلەدى. مەن ءۇشىن فيلمدەرىمدە وتباسى تاقىرىبى وتە ماڭىزدى جانە ول بارلىق ۋاقىتتا وزەكتى بولىپ قالا بەرەدى. سوندىقتان تۋىسقاندىق قاتىناس تۋرالى فيلدەردى زەرتتەپ، ونى ءتۇرلى وقيعا جەلىسىمەن بەرۋگە بولادى»، - «اعايىندىلار» ءفيلمىنىڭ رەجيسسەرى دارحان تولەگەنوۆ.
«اعايىندىلار» ءفيلمى اقش، كانادا، رەسەي جانە البانياداعى كينوفەستيۆالدەردىڭ رەسمي باعدارلامالارىنا ەنگەن. كارتينا كەلەسى جىلدىڭ باسىندا وتاندىق پروكاتقا شىعادى.