قازاقستان پرەزيدەنتى قاسىم-جومارت توقايەۆ حالىققا جولداۋىندا ەلدىڭ دامۋىنا قاتىستى جاڭا مىندەتتەر جۇكتەدى. باستى نازار – سيفرلاندىرۋعا، جاساندى ينتەللەكتىنى ەنگىزۋ مەن ەكونوميكانى تۇراقتى دامىتۋعا اۋدارىلدى. جولداۋدا ساياسي وزگەرىستەر، ينۆەستيسيا تارتۋ مەن ينفراقۇرىلىمدى جاڭارتۋ جاعى ايتىلدى. وڭىرلىك كوممۋنيكاسيالار قىزمەتىندە الماتى قالاسى ازاماتتىق اليانسىنىڭ ءتوراعاسى قايىرجان ابدىحالىقوۆ وسىعان توقتالدى.
پرەزيدەنت ەلدەگى بارلىق سالانى قامتيتىن ۇلكەن جوسپار ۇسىندى. ونىڭ سوزىنشە، قازاقستاننىڭ العا جىلجۋى سيفرلىق تەحنولوگيالار مەن جاساندى ينتەللەكتىنى قولدانا بىلۋىمىزگە بايلانىستى.
جولداۋدا جاساندى ينتەللەكت جانە سيفرلىق دامۋ مينيسترلىگىن قۇرۋ ۇسىنىلدى. بۇل مينيسترلىك سيفرلاندىرۋ ءىسىن ۇيلەستىرىپ، اۋىل شارۋاشىلىعى، ءبىلىم بەرۋ، تۇرعىن ۇي-كوممۋنالدىق شارۋاشىلىق پەن سۋ رەسۋرستارى سياقتى بىرنەشە سالاعا جاۋاپتى بولماق.
توقايەۆ ونەركاسىپتىڭ دامۋىنا ەرەكشە توقتالدى. ونىڭ ايتۋىنشا، جاڭا تەحنولوگياسىز ەكونوميكانى ءارتاراپتاندىرۋ مۇمكىن ەمەس. اۋىل شارۋاشىلىعىندا دا وزگەرىس بولادى. عىلىمي ورتالىقتار بازاسىندا اگروتەحنولوگيالىق حاب قۇرىلىپ، سۋ رەسۋرستارىن باقىلاۋ ءۇشىن سيفرلىق جۇيەلەر ەنگىزىلمەك.
«پرەزيدەنت كولىك پەن لوگيستيكا سالاسىنىڭ بولاشاعىن اتاپ ءوتتى. قازاقستان ايماقتاعى باستى توراپقا اينالۋى ءتيىس. ول ءۇشىن جاڭا جول سالىنىپ، ساۋداعا قولايلى جاعداي جاسالادى»، – دەپ اتاپ ءوتتى سپيكەر.
ەسكى سۋ مەن كوممۋنالدىق جۇيەلەردى جاڭارتۋ جوسپارلانىپ، ەنەرگيانى ۇنەمدەيتىن جاڭا تەحنولوگيالار دا ەنگىزىلەدى.
جولداۋدا مامان تاپشىلىعى دا ايتىلدى. كەي سالادا بىلىكتى كادر جەتىسپەيتىندىكتەن، شەتەلدىك مامانداردى تارتۋعا تۋرا كەلەدى. پرەزيدەنتتىڭ ايتۋىنشا، بۇل قادام عىلىم مەن ءوندىرىستى دامىتۋعا كومەكتەسپەك.
سونداي-اق، جول-كولىك قاۋىپسىزدىگى ماسەلەسى دە قوزعالدى. ەندى ەلەكتروساموكاتتار مەن كيكشەرينگكە بايلانىستى زاڭ قاتاڭداماق.
سىرتقى ساياساتتا قازاقستان ارىپتەستىك بايلانىستاردى جالعاستىرادى. رەسەي، جۇڭگو، اقش، ەۋروپا ەلدەرى، ءۇندىستان، تاياۋ شىعىس جانە ورتالىق ازيا مەملەكەتتەرىمەن قارىم-قاتىناس نىعايادى. جىل سوڭىنا دەيىن بىرنەشە ەلدىڭ باسشىسى قازاقستانعا ساپارلاپ كەلمەك.
پرەزيدەنت ساياسي وزگەرىستەرگە دە توقتالدى. پارلامەنتتىك رەفورما باستالىپ، وعان ساراپشىلار مەن قوعام وكىلدەرى اتسالىسادى. 2027 جىلى رەفەرەندۋم ءوتىپ، وندا پارلامەنتتىڭ جاڭا قۇرىلىمى انىقتالادى.
“بۇل جولداۋ قازاقستاننىڭ جاڭا دامۋ باعىتىن ايقىندايدى. ول سيفرلىق تەحنولوگيانى دامىتۋعا، ەكونوميكا مەن ساياساتتى جاڭعىرتۋعا مۇمكىندىك بەرەدى»، – دەدى اليانس ءتوراعاسى.