قازاقستانداعى زاڭسىز قوقىس پوليگوندارى مەملەكەتكە ميلليارد تەڭگەدەن استام شىعىن اكەلدى
ق ر ەكولوگيا، گەولوگيا جانە تابيعي رەسۋرستار مينيسترلىگى الماتىدا وتكىزگەن كوشپەلى كەڭەستە زاڭسىز قوقىس ورىندارىن جويۋ بويىنشا جۇرگىزگەن مونيتورينگ ناتيجەسىن ۇسىندى.
2020 جىلى عارىشتىق مونيتورينگپەن قامتىلعان 23 قالادا (https://waste.garysh.kz) 8 884 رۇقسات ەتىلمەگەن قوقىس پوليگونى انىقتالىپ، ونىڭ 80% جويىلدى. بۇگىنگى تاڭدا عارىشتىق مونيتورينگپەن اۋدانى 250 025 شارشى كم استام 35 ءىرى ەلدى مەكەن قامتىلىپ وتىر دەپ حابارلادى Almaty-akshamy.kz ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ حابارىنا سىلتەمە جاساپ.
ق ر ەكولوگيا، گەولوگيا جانە تابيعي رەسۋرستار مينيسترلىگى ەلدى مەكەندەر توڭىرەگىندە زاڭسىز قوقىس ۇيىندىلەرىن جويۋ جانە ولارعا جول بەرمەۋ بويىنشا ۆەدومستۆوارالىق جۇيەلى ءىس-شارالار قابىلداۋدىڭ جوسپارىن ىسكە اسىرۋعا كىرىستى.
ۆەدومستۆو قوسىمشا «جەدەل» جەلىنى ىسكە قوستى (+7775 952 49 00). بۇگىنگى كۇنى جەلىگە 1 300 ءوتىنىش تۇسكەن. 2021 جىلعى 1 ناۋرىزداعى جاعداي بويىنشا، 787 قوقىس ورنى جويىلدى. جىل سايىن جەرگىلىكتى اتقارۋشى ورگانداردىڭ بيۋدجەتىنەن زاڭسىز قوقىس ۇيىندىلەرىن جويۋعا شامامەن 100 ملن تەڭگە بولىنەدى.
قوقىستىڭ زاڭسىز توگىلۋ پروبلەماسىن شەشۋ جاڭا ەكولوگيالىق كودەكستە دە كۇشەيتىلىپ وتىر. ەكولوگيا ۆيسە-مينيسترى احمەتجان ءپىرىمقۇلوۆتىڭ ايتۋىنشا، ەلىمىزدە شىعاتىن قالدىقتار كولەمى كۇن سايىن ءوسىپ كەلەدى. ونى شەشۋدىڭ بىردەن ءبىر جولى – قالدىقتاردى ەنەرگياعا اينالدىرۋ، - دەيدى ۆيسە-مينيستر.
20 مامىردا ەكولوگيا مينيسترلىگى قالدىقتاردى ەنەرگياعا اينالدىرۋ جوبالارى بويىنشا اۋكسيوندىق ساۋدا-ساتتىق جاريالادى. «Waste to Energy» كەشەندەرىن اقتوبە، الماتى، وسكەمەن، نۇر-سۇلتان، قاراعاندى جانە شىمكەنت قالالارىندا ىسكە قوسۋ جوسپارلانىپ وتىر. زاۋىت قۇرىلىسى ينۆەستورلاردى تارتۋ ەسەبىنەن جوسپارلانعان. التى كەشەننىڭ قۇرىلىسىنا تارتىلاتىن ينۆەستيسيانىڭ جالپى كولەمى 181 ملرد تەڭگە.
زاڭ تالابى بويىنشا اۋاعا شىعارىندىلار ەۋروپالىق ستاندارتتارعا ساي بولۋ تالابى قويىلعان. سونداي-اق بولاشاق زاۋىتتاردىڭ وسى تالاپتارعا سايكەستىگىنە مەملەكەتتىك باقىلاۋ جۇرگىزىلەتىن بولادى.
قاتتى تۇرمىستىق قالدىقتاردى باسقارۋعا قاتىستى ۇسىنىلىپ وتىرعان جۇيەنى ەنگىزۋ بارىسىندا قوقىس پوليگوندارىنا بالاما ەنگىزۋ ەسەبىنەن مەملەكەتتىك بيۋدجەتتى 5 جىل ىشىندە 5،4 ملرد تەڭگەگە دەيىن ۇنەمدەۋگە مۇمكىندىك بەرەدى. ناتيجەسىندە 6 070 520 توننا قتق جۇيەلى باسقارىلادى.
«Waste to Energy» ەنەرگەتيكالىق كادەگە جاراتۋ جونىندەگى جوبانى ىسكە اسىرۋ جىل سايىن تۇزىلەتىن 5 ملن تونناعا جۋىق قتق كادەگە جاراتۋعا جول اشادى. اتاپ ايتقاندا، قايتا وڭدەۋ كولەمىن 1،65 ملن. تونناعا دەيىن ۇلعايادى (750 مىڭ توننا – سۇرىپتاۋ جانە قايتا وڭدەۋ، 900 مىڭ توننا - قالدىقتاردى ەنەرگياعا اينالدىرۋ). سونىڭ ناتيجەسىندە 2024 جىلعا قاراي قالدىقتاردى قايتا وڭدەۋ كورسەتكىشىن 30%-عا دەيىن جەتكىزۋگە مۇمكىندىك بەرەدى. ەكولوگيا مينيسترلىگى اتالعان جوباعا قوعام قىزىعۋشىلىعىن ەسكەرە وتىرىپ، قازاقستاندا «Waste to Energy» جوباسىن ىسكە اسىرۋ ماسەلەلەرى بويىنشا قوعامدىق مونيتورينگتىك كوميسسيا قۇرۋ تۋرالى شەشىم قابىلدادى.
