قازاقستاندا بالالار مەن ەرەسەكتەردى ۆاكسينالاۋ ۇلتتىق پروفيلاكتيكالىق ەگۋلەر كۇنتىزبەسى اياسىندا تەگىن جۇرگىزىلەدى.
الماتى №36 قالالىق ەمحاناسىنىڭ يممۋنولوگ دارىگەرى اسەل ەرالى قىزىنىڭ ايتۋىنشا، ەكپە مەملەكەتتىك ەمحانادا جانە ازاماتتار تىركەلگەن جەكە مەديسينالىق ۇيىمدا قولجەتىمدى.
سابيگە العاشقى ەكپە پەرزەنتحانادا-اق سالىنادى: تۋعاننان كەيىنگى العاشقى 12 ساعات ىشىندە ۆ گەپاتيتىنە قارسى ۆاكسينا، ال 3-5-كۇندەرى تۋبەركۋلەزدەن قورعاۋ ءۇشىن بسج ۆاكسيناسى ەگىلەدى.
ەكى ايىندا بالا ۆ گەپاتيتىنە قارسى ۆاكسينانىڭ ەكىنشى دوزاسىن، ابكدس-قا (كوكجوتەل، ديفتەريا جانە سىرەسپەگە قارسى) قارسى العاشقى ۆاكسيناسىن، يناكتيۆتەلگەن پوليوميەليت ۆاكسيناسىنىڭ (يپۆ) ءبىرىنشى دوزاسىن، ۆ ءتيپتى گەموفيلدى ينفەكسياعا قارسى جانە پنيەۆموكوكك ينفەكسياسىنا قارسى العاشقى ۆاكسينالاردى الادى.
ءۇش ايىندا بالاعا ابكدس-تىڭ ەكىنشى ۆاكسيناسى، پوليوميەليتكە قارسى ەكىنشى دوزا جانە گەموفيلدى ينفەكسياعا قارسى ەكىنشى ۆاكسينالاۋ جۇرگىزىلەدى. ءتورت ايلىعىندا ابكدس-تىڭ ءۇشىنشى ۆاكسيناسى، پوليوميەليت پەن گەموفيلدى ينفەكسياعا قارسى ءۇشىنشى ەكپە جانە پنيەۆموكوكك ينفەكسياسىنا قارسى ەكىنشى ۆاكسينا سالىنادى. التى ايىندا بالا ۆ گەپاتيتىنە قارسى ۆاكسينانىڭ ءۇشىنشى دوزاسىن قابىلدايدى.
ءبىر جاسىندا بالاعا قىزىلشا، قىزامىق جانە ەپيدەميالىق پاروتيتكە (كقپ) قارسى العاشقى ۆاكسينالاۋ، پوليوميەليتكە قارسى (اۋىز ارقىلى) ءتورتىنشى ۆاكسينالاۋ، سونداي-اق پنيەۆموكوكك ينفەكسياسىنا قارسى ءۇشىنشى ۆاكسينالاۋ جۇرگىزىلەدى.
ءبىر جارىم جاسىندا (18 اي) بالاعا ابكدس العاشقى ريەۆاكسينالاۋ جانە پوليوميەليتكە قارسى العاشقى ريەۆاكسينالاۋ جاسالادى.
ەكى جاسىندا ەپيدەميولوگيالىق كورسەتكىشتەر بويىنشا بالاعا ۆ گەپاتيتىنە قارسى ۆاكسينالاۋ جۇرگىزىلەدى، ال 6 ايدان كەيىن ەكىنشى دوزا ەگىلەدى.
التى جاسىندا بالالارعا قىزىلشا، قىزامىق جانە ەپيدەميالىق پاروتيتكە قارسى ريەۆاكسينالاۋ، سونداي-اق ابكدس ۆاكسيناسىمەن ريەۆاكسينالاۋ جاسالادى.
2024 جىلدان باستاپ قازاقستاندا 11-13 جاس ارالىعىنداعى قىزدارعا ادام پاپيللوماسى ۆيرۋسىنا (اپۆ) قارسى ۆاكسينالاۋ ەنگىزىلدى. ۆاكسينالاۋ ەكى دوزادا التى ايلىق ارالىقپەن جۇرگىزىلەدى.
16 جاسىندا جاسوسپىرىمدەرگە ادس-م (ديفتەريا مەن سىرەسپەگە قارسى از مولشەرلى) ۆاكسيناسىمەن ريەۆاكسينالاۋ جاسالادى.
ەرەسەك جاستا ءار 10 جىل سايىن سوڭعى ريەۆاكسينالاۋدان كەيىن ديفتەريا مەن سىرەسپەگە قارسى يممۋنيتەتتى ساقتاۋ ءۇشىن ادس-م ۆاكسيناسىمەن قايتا ەگۋدەن ءوتۋ قاجەت.
قازاقستانداعى تەگىن ەكپەلەر تۋبەركۋلەز، ۆ گەپاتيتى، كوكجوتەل، ديفتەريا، سىرەسپە، پوليوميەليت، گەموفيلدى ينفەكسيا، پنيەۆموكوكك ينفەكسياسى، قىزىلشا، قىزامىق، ەپيدەميالىق پاروتيت، ا گەپاتيتى جانە ادام پاپيللوماسى ۆيرۋسى سياقتى ەڭ ءقاۋىپتى ينفەكسيالىق اۋرۋلاردان قورعاۋعا باعىتتالعان. ولار - حالىق دەنساۋلىعىن قورعاۋ جانە ينفەكسيالىق اۋرۋدىڭ الدىن الۋ جونىندەگى مەملەكەتتىك باعدارلامانىڭ ماڭىزدى بولىگى.
قازاقستاندا 27 ءساۋىر مەن 3 مامىر ارالىعىندا، كوپتەگەن باسقا ەلدەگىدەي، ەۋروپالىق يممۋنداۋ اپتالىعى وتەدى. بۇل جىل سايىنعى باستاما حالىقتىڭ ۆاكسينالاۋدىڭ ءومىر مەن دەنساۋلىقتى قورعاۋداعى ماڭىزى تۋرالى حاباردارلىعىن ارتتىرۋعا باعىتتالعان. اپتا اياسىندا اقپاراتتىق ناۋقاندار، دارىگەرلەرمەن كەزدەسۋ، دارىستەر مەن الدىن الۋ شارالارى ۇيىمداستىرىلىپ، بالالار مەن ەرەسەكتەردى ۋاقتىلى ۆاكسينالاۋدىڭ قاجەتتىگى ەسكە سالىنادى.
تەگىن ەكپەنى الۋ ءۇشىن تىركەلگەن ەمحاناعا جۇگىنۋ قاجەت. ۆاكسينالاۋ جاس ەرەكشەلىگىنە سايكەس قاتاڭ گرافيك بويىنشا، سونداي-اق قاجەت بولعان جاعدايدا ەپيدەميولوگيالىق كورسەتكىش بويىنشا جۇرگىزىلەدى.