30 ءساۋىر كۇنى ساعات 11:00-دە الماتى قالاسىندا سيرەنالار قوسىلادى: جالپى قالالىق جوسپارلى سەيسميكالىق جاتتىعۋ وتكىزىلەدى، دەپ حابارلايدى Aqshamnews.kz الماتى قالاسىنىڭ تجد-نا سىلتەمە جاساپ.
جالپىقالالىق سەيسميكالىق جاتتىعۋعا الدىن الا دايىندىق قولعا الىندى: 28 ساۋىردەن باستاپ تەلە-راديوارنالاردا الداعى جوسپارلى جاتتىعۋ تۋرالى بەينەروليكتەر مەن سابىر ساقتاۋعا شاقىراتىن حابارلامالار كورسەتىلىپ جاتىر.
سەيسميكالىق جاتتىعۋ وتەتىن كۇنى ساعات 11:00-دە قالالىق حابارلاۋ جۇيەسى ىسكە قوسىلادى: سيرەنالىق-داۋىس حابارلاۋ قۇرىلعىلارى، تەلە-راديوارنالاردى اۆتوماتتى تۇردە توقتاتىپ، شۇعىل اقپارات بەرۋ، ءموبيلدى قوسىمشالار ارقىلى حابارلامالار جىبەرۋ جوسپارلانعان.
«بارشانىڭ نازارىنا!!!» دىبىستىق سيگنالى – بۇل توتەنشە جاعداي ءقاۋپى نەمەسە تۋىنداعان جاعدايدا حالىقتىڭ نازارىن اۋدارۋ ءۇشىن بەرىلەتىن ەسكەرتۋ سيگنالى.
دىبىستىق سيگنالدى ەستىگەن كەزدە دەرەۋ تەلەديدار مەن راديوقابىلداعىشتى قوسىپ، ينتەرنەت-رەسۋرستار مەن ءموبيلدى قوسىمشالار ارقىلى رەسمي اقپارات الىپ، ودان ءارى ارەكەت ەتۋ بويىنشا نۇسقاۋلارمەن تانىسۋ قاجەت.
سەيسميكالىق جاتتىعۋ باستالعانعا دەيىن دابىل شابادانىن دايىنداڭىز، ءقاۋىپسىز جەرگە اپاراتىن ەڭ قىسقا جولدى انىقتاڭىز. ەستەرىڭىزگە سالا كەتەيىك، ءقاۋىپسىز ورىن – بۇل ەلەكتر جەلىلەرىنەن، اعاشتاردان جانە عيماراتتاردان الىس ورنالاسقان اشىق الاڭ.
الماتى قالاسىندا حالىقتى قابىلدايتىن 384 پۋنكت بار. تولىق اقپاراتپەن مىنا سىلتەمە ارقىلى تانىسۋعا بولادى: https://www.gov.kz/memleket/entities/emer-almaty/documents/details/379263؟lang=ru
حالىقتى قابىلداۋ پۋنكتتەرى تۋرالى تولىق اقپارات 2گيس كارتاسىندا «زارداپ شەككەن حالىقتى قابىلداۋ پۋنكتتەرى» دەپ ىزدەۋ ارقىلى جانە الماتىنىڭ توتەنشە جاعدايلار دەپارتامەنتى مەن اكىمدىكتىڭ رەسمي سايتىنان تابۋعا بولادى.
ءارى قاراي قولجەتىمدى حابارلاۋ قۇرالدارى (داعدارىس شابادانىنداعى راديوقابىلداعىش، ءموبيلدى قوسىمشالار، سيرەنالىق-داۋىس قۇرىلعىلارى جانە ت.ب.) ارقىلى كەلەسى ىس-ارەكەتتەر بويىنشا نۇسقاۋلىقتاردى قاتاڭ ساقتاڭىز.
وتكىزىلىپ جاتقان قالالىق سەيسميكالىق جاتتىعۋ جوسپارلى تۇردە جۇرگىزىلەتىنىن ەسكە سالامىز. ازاماتتاردى سابىر ساقتاۋعا جانە بەلسەندى قاتىسۋعا شاقىرامىز.