قازاقستانداعى قارتتار ۇيىندە قانشا قاريا تۇرىپ جاتىر؟

ۆەدومستۆو مالىمەتىنشە، 2022 جىلدىڭ سوڭىندا قازاقستاندا ارناۋلى الەۋمەتتىك قىزمەتتەر كورسەتەتىن 281 ۇيىم (2021 جىلى – 272 بىرلىك) بولدى، ونىڭ ىشىندە ستاسيونارلىق ۇلگىدەگى 172 ۇيىم، جارتىلاي ستاسيونار – 75، ۋاقىتشا قابىلدايتىندار – 31، سونداي-اق ارناۋلى الەۋمەتتىك قىزمەتتەر كورسەتۋدىڭ بىرنەشە شارتتارى بار 3 ۇيىم بار، دەپ حابارلايدى Almaty-akshamy.kz Ulysmedia.kz-كە سىلتەمە جاساپ. 

“2022 جىلدىڭ سوڭىندا وسى ۇيىمداردا تۇراتىنداردىڭ سانى 40 321 ادامدى قۇرادى، ونىڭ ىشىندە زەينەت جاسىنداعىلار – 13 624 ادام (33،8%)، ۇلى وتان سوعىسىنىڭ قاتىسۋشىلارى مەن مۇگەدەكتەرى – 14 ادام (0،03%)”، – دەلىنگەن حابارلامادا.

ارناۋلى الەۋمەتتىك قىزمەتتەر كورسەتۋ جونىندەگى ۇيىمداردا تۇراتىنداردىڭ نەگىزگى كونتينگەنتى – مۇگەدەكتىگى بار ادامدار. ولاردىڭ سانى – 24 724 ادام نەمەسە قىزمەت الۋشىلاردىڭ جالپى سانىنىڭ 61،3%-ى.

ايتا كەتەيىك، 245 مەكەمە مەملەكەتتىك مەنشىكتە بولسا، 36-سى جەكە مەنشىكتە (ونىڭ ىشىندە شەتەلدىك مەنشىكتە – 4).   

بۇگىندە قازاقستاندا قارتتار مەن مۇگەدەكتىگى بار ادامدارعا ارنالعان 48 مەديسينالىق-الەۋمەتتىك مەكەمە جۇمىس ىستەيدى، وندا 5 756 ادام تۇرادى. 2021 جىلى 53 قارتتار ءۇيى جۇمىس ىستەدى، وندا 7 321 ادام تۇردى.