2020 جىلى قازاقستاندا 199،4 مىڭ توننا وڭدەلگەن كۇرىش ءوندىرىلدى، بۇل رەسپۋبليكانىڭ ىشكى نارىقتاعى قاجەتتىلىگىن185،9%-عا قامتاماسىز ەتەدى.
جاڭا وندىرىستەردى ىسكە قوسۋدىڭ ارقاسىندا قايتا وڭدەلگەن كۇرىش ءوندىرىسى قارقىن الدى، دەپ حابارلايدى Almaty-akshamy.kz اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.
الداعى بىرنەشە جىلدا ەگىس القاپتارىن ءارتاراپتاندىرۋعا بايلانىستى كۇرىشتى ىشكى نارىققا جەتەتىندەي كولەمدە عانا ءوندىرۋ جوسپارلانىپ وتىر.
سالىستىرا ايتار بولساق، 2019 جىلى 166 مىڭ توننا ءونىم ءوندىرىلدى. ياعني، ءبىر جىل ىشىندە ءوندىرىس ءوسىمى 20%-دان استى.
وتكەن جىلى ءوندىرىس ءوسىمىنىڭ ارقاسىندا وڭدەلگەن كۇرىشتىڭ ەكسپورتى 12،7%-عا ارتىپ، 101،2 مىڭ توننانى قۇرادى. سونىڭ ناتيجەسىندە يمپورت 57،7 %-عا، ياعني، 9 مىڭ تونناعا دەيىن تومەندەدى.
قازىرگى ۋاقىتتا وتاندىق ءوندىرىستىڭ ارقاسىندا يمپورتتىڭ ۇلەسى 8،4% عانا.
2015 جىلدان بەرى قازاقستاندا كۇرىشتى ءوندىرۋ مەن قايتا وڭدەۋ سالاسىندا جالپى قۇنى 2،3 ملرد تەڭگە بولاتىن 8 ينۆەستيسيالىق جوبا ىسكە اسىرىلدى. سونىڭ ناتيجەسىندە ءوندىرىس ءوسىمى قارقىن الدى.
مەملەكەتتىك قولداۋ شارالارى اياسىندا جاڭا كاسىپورىندار سالۋ، جۇمىس ىستەپ تۇرعان قايتا وڭدەۋ كاسىپورىندارىن كەڭەيتۋ جانە جاڭعىرتۋ جۇمىستارىن جۇزەگە اسىرعاندا ينۆەستيسيالىق سۋبسيديالار قاراستىرىلدى.
بۇدان بولەك، «قاراپايىم زاتتار ەكونوميكاسى» اياسىندا قايتا وڭدەۋ كاسىپورىندارىن ينۆەستيسيالاۋعا جانە اينالىم قاراجاتىن تولىقتىرۋعا مۇمكىندىك بەرەتىن جىلدىق سىياقى مولشەرى 6%-دىق جەڭىلدەتىلگەن نەسيەلەر بار.
سونىمەن قاتار، ەكىنشى جىل قاتارىنان رەسپۋبليكانىڭ اگروونەركاسىپ كەشەنىندە ەگىس القاپتارىن ءارتاراپتاندىرۋ ساياساتى جۇرگىزىلىپ جاتىر. ماسەلەن، بيىل وبلىس اكىمدىكتەرىنىڭ دەرەكتەرى بويىنشا، كۇرىش ەگەتىن الاڭ 8،4 مىڭ گەكتارعا قىسقارعان. ياعني، ەلىمىزدەگى جالپى كۇرىش ەگىس القابى 95،6 مىڭ گەكتارعا دەيىن ازايدى.
كۇرىش القاپتارىنىڭ كولەمىن بىرتىندەپ ازايتىپ، ونىڭ ورنىنا ءتيىمدى ءارى ىلعالدى از قاجەت ەتەتىن باقشا ونىمدەرىنىڭ، جەم-شوپ پەن مايلى داقىلداردىڭ القاپتارىن ۇلعايتۋ جوسپارلانىپ وتىر.