1 اقپاننان باستاپ مەنشىكتەگى مالدى تىركەتۋ كەرەك.
قازاقستان ۇكىمەتى مەملەكەت ازاماتتارىنىڭ مەنشىگىندەگى مالدى تىركەتۋگە شاقىرىپ وتىر، دەپ حابارلايدى Almaty-akshamy.kz.
مامانداردىڭ ايتۋىنشا، وسى ارقىلى تىركەلمەگەن اۋىل شارۋاشىلىعى جانۋارلارىن بىردەيلەندىرۋ جانە تىركەۋ جونىندەگى جۇمىستى اياقتاۋعا بولادى.
«اۋىل شارۋاشىلىعى ءمينيسترى ەربول قاراشوكەيەۆ «اۋىل شارۋاشىلىعى جانۋارلارىن بىردەيلەندىرۋ» دەرەكتەر بازاسىندا «جاسىل ءدالىز-3» فۋنكسيونالىن ىسكە قوسۋدى تاپسىردى. بۇل تىركەلمەگەن اۋىل شارۋاشىلىعى جانۋارلارىن بىردەيلەندىرۋ جانە تىركەۋ جونىندەگى جۇمىستى اياقتاۋعا مۇمكىندىك بەرەدى»، - دەپ جازدى ءاشم-نىڭ باسپا ءسوز حاتشىسى دامير اسپان Facebook-تەگى پاراقشاسىنا.
فۋنكسيونال 2022 جىلعى 1 اقپاننان 31 مامىرعا دەيىن جۇمىس ىستەيدى دەپ جوسپارلانىپ وتىر جانە بۇل تەك ارناۋلى ايماققا عانا ەمەس، بۇكىل ەلدىڭ شارۋاشىلىعىنا قاتىستى.
«مينيستر اۋىل شارۋاشىلىعى جانۋارلارىن بىردەيلەندىرۋ ەرەجەلەرىنە، سونداي-اق تىركەلمەگەن جانۋارلاردى تىركەۋدە بىردەيلەندىرۋ جونىندەگى دەرەكقوردى قالىپتاستىرۋ جانە جۇرگىزۋ قاعيدالارىنا وزگەرىستەر مەن تولىقتىرۋلار ەنگىزۋدى تاپسىردى. بۇعان قوسا دەرەكقورعا تۇزەتۋلەر ەنگىزۋ الگوريتمىن ازىرلەۋ بويىنشا جۇمىستى جەدەلدەتۋ قاجەت. دەدلاين بيىلعى جىلدىڭ مامىر ايىنىڭ سوڭىنا دەيىن. قازاقتىڭ شۇرايلى جەرىن باسىپ، ءشوبىن جەپ جۇرگەن ءار مال ەسەپتە بولۋى ءتيىس، تارتىپ الادى، سالىق ۇلعايتادى دەگەن سىندى جانساق پىكىردەن اۋلاق بولىڭىزدار، اعايىن»، - دەپ جازدى دامير اسپان.
مامانداردىڭ ايتۋىنشا، «جاسىل ءدالىز – 2» اياسىندا جۇرگىزىلگەن جۇمىستاردىڭ قورىتىندىسى بويىنشا، تەك ماڭعىستاۋ وبلىسىندا قوسىمشا 71 343 اۋىل شارۋاشىلىعى جانۋارى تىركەلگەن ەدى.