ەلدەگى اۆتوكولىك سانى 3،9 ميلليوننان 5 ميلليونعا دەيىن ءوستى.
قازاقستاننىڭ ىشكى ىستەر ءمينيسترى مارات احمەتجانوۆ كولىكتى تەحنيكالىق تەكسەرۋ وپەراتورلارىنىڭ جاۋاپكەرشىلىگىن كۇشەيتۋدى ۇسىندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءوز سوزىندە مينيستر ەلدەگى اۆتوپاركتىڭ ارتىپ كەلە جاتقانىن ايتتى.
«2019 جىلدان باستاپ اۆتوكولىك سانى 3،9 ميلليوننان 5 ميلليونعا دەيىن ءوستى. ونىڭ ىشىندە شەتەلدىك تىركەۋدەگى كولىكتەر دە بار. بۇعان قوسا، اۆتوپارك ەسكىرىپ جاتىر. ەلىمىزدەگى 50% پايىزدان استام كولىكتەردىڭ پايدالانۋ مەرزىمى 20 جىلدان اسىپ كەتكەن. ياعني، توزىعى جەتكەن»، - دەدى ىشكى ىستەر ءمينيسترى ۇكىمەتتىڭ بۇگىنگى وتىرىسىندا.
سونىمەن بىرگە، مارات احمەتجانوۆ اۆتوكولىكتەردىڭ تەحنيكالىق جاعدايىنا ءتيىستى باقىلاۋ جۇرگىزىلمەيتىنىن ايتتى.
«وزدەرىڭىز بىلەسىزدەر، تەحنيكالىق تەكسەرۋ ورتالىقتارىن اشۋعا قويىلاتىن تالاپتار تومەندەتىلدى. 2016 جىلى ولاردى اشۋ ءتارتىبى ليسەنزيالاۋدان حابارلاما تۇرىنە وزگەردى. 2018 جىلى بۇل قىزمەتكە رۇقسات بەرۋ باقىلاۋى جويىلدى. بۇل جاعداي كولىكتى تەحنيكالىق بايقاۋدان جالعان وتكىزىپ، تالوندار بەرۋ پراكتيكاسىنا اكەپ سوقتى. بىلتىر سىبايلاس جەمقورلىققا قارسى قىزمەت وسىنداي 350 مىڭ جالعان قۇجات جاساپ، 600 ملن تەڭگە زاڭسىز تابىس تاپقان ۇيىمداسقان قىلمىستىق توپتى ۇستادى»، - دەدى ۆەدومستۆو باسشىسى.
وعان قوسا، سوڭعى 4 جىلدا تەحنيكالىق جايدايعا بايلانىستى بايقاۋدان وتپەي قالعان كولىكتەردىڭ سانى ەكى ەسەگە ازايعان.
«بۇل ارينە، ۇلكەن كۇمان تۋدىرادى. ويتكەنى كولىكتەردىڭ تەحنيكالىق رەگلامەنت تالاپتارىنا ساي كەلمەۋىنە بايلانىستى 106 مىڭ جۇرگىزۋشى جاۋاپقا تارتىلعان. سونداي-اق، تەحنيكالىق بايقاۋدان وتپەگەن 80 مىڭ جۇرگىزۋشىگە ايىپپۇل سالىندى. كەزىندە بۇل فۋنكسيا كاسىپكەرلىك سالاسىنا بەرىلگەن بولاتىن. ءبىراق، پروسەدۋرانى جەڭىلدەتەمىز دەپ، كوپتەگەن تەرىس سالدارعا جول بەردىك. جول اپاتتارى كوبەيىپ، جەمقورلىق ارتتى. وسىعان بايلانىستى، يندۋستريا مينيسترلىگىنە اۆتوكولىكتى جالعان تەكسەرۋ فاكتىلەرى ءۇشىن تەحنيكالىق بايقاۋ وپەراتورلارىنىڭ جاۋاپكەرشىلىگىن كۇشەيتۋدى ۇسىنامىز»، - دەدى مارات احمەتجانوۆ.