ەلىمىزدىڭ باتىسىندا پاراسات نۇرعالييەۆ ەسىمدى الىپ ازامات بار.
ونىڭ بويى 2 مەتر 15 سانتيمەتر، ال سالماعى 150 كيلوگرامم، اياق كيىم ولشەمى 56، دەپ حابارلايدى Almaty-akshamy.kz
جاقىندا 27 جاسقا تولاتىن پاراسات - وتباسىنىڭ كەنجەسى.
اتىراۋدىڭ الىپ ازاماتى تۋرالى جازعان «اق جايىق» پورتالىنىڭ مالىمەتىنشە، ونىڭ مەكتەپ بىتىرەردەگى سالماعى 120 كيلوگرامم، بويى 2 مەتر بولعان.
وزگەلەردەن دەنە ءبىتىمى ەرەكشە، الىپ تۇلعالى پاراسات نۇرعالييەۆ يندەر اۋدانى جارسۋات وكرۋگىنە قاراستى قۇرىلىس اۋىلىندا تۇرادى.
پاراساتتىڭ ەرەكشە دەنە ءبىتىمى وعان كيىم تابۋدا قيىندىق تۋدىرىپ كەلەدى. سوندىقتان ول كوبىنە تىگىنشىنىڭ قىزمەتىنە جۇگىنۋگە ءماجبۇر. جىلى ماۋسىمدا اياعىنا سۇيرەتپە رەزەڭكە اياق كيىم كيگەنىمەن، كۇن سالقىنداعان كەزدە شاق كەلەتىن اياق كيىم تاپپاي، ۇيدەن شىعا الماي قالعان كەزدەرى دە بولعان. سوندىقتان اۋىلداستارى وعان كومەكتەسۋگە بەل بۋىپ، اياعىنىڭ ولشەمىنە ساي اياق كيىمگە تاپسىرىس بەرگەن.
«قازاقتىڭ الىبى قاجىمۇقان اتامىزدىڭ اياق كيىمىنىڭ ولشەمى 54 بولىپتى. ال پاراساتتىڭ اياعى ودان دا ۇلكەن. وعان شاق كەلەر اياق كيىمدى تىكتىرۋ ءۇشىن ءبىرتالاي جەرگە حابارلاستىم، ءبىراز تىگىنشىمەن سويلەستىم. اياعىنىڭ ۇلكەندىگىن بىلگەن سوڭ ءبارى باس تارتادى. ءسويتىپ، قينالىپ جۇرگەنىمدە، الماتىدان تىگىنشى ۆالەريي ۆورونين عانا كەلىسىم بەردى. ول شەبەر 40 جىلدىق كاسىبىندە 49-شى ولشەمنەن ارتىق اياق كيىم تىكپەگەن ەكەن»، - دەيدى پاراساتتىڭ اۋىلداسى بايعالي وتەمانوۆ.
ونىڭ ايتۋىنشا، تىگىنشى بۇل ۇسىنىسقا قىزىعۋشىلىق تانىتىپ، مۇنداي ولشەمدەگى قالىبى جوقتىعىنا قاراماستان، پاراساتقا ارناپ اياق كيىم تىگۋگە ۋادە بەرگەن. وسىلايشا ۆورونين ۋادەسىن ورىنداپ، 52ء-شى ولشەمدى قالىپتى ۇلكەيتىپ، 20 كۇننىڭ اينالاسىندا 200 مىڭ تەڭگەگە اياق كيىم تىگىپ بەرگەن.
پاراسات 2014 جىلى قۇرىلىس ورتا مەكتەبىن ءبىتىرىپ، اتىراۋداعى وقۋ ورنىندا تەمىر ءپىسىرۋشى ماماندىعىن يگەرگەن.
«اكەم سەرىكقالي قايتىس بولعان، انام قوڭىرشا ەكەۋمىز بىرگە تۇرامىز. انامنىڭ ايتۋىنشا، دۇنيەگە كەلگەندە سالماعىم ۇلكەن بولماعان. ال اجەم اۋەز اسا ەتجەڭدى بولماعانىمەن، سۇيەكتى، ءىرى بولعان. اكەم دە جاۋىرىندى، دەنەلى ەدى، قولىنىڭ ءوزى ءداۋ بولاتىن. مەنى كورگەندەر اكەڭە تارتقانسىڭ دەيدى. ال اعالارىم مەندەي ەمەس، بويلارى ورتاشا»، - دەيدى پاراسات.
ول دەنە بىتىمىندەگى وزگەرىستى مەكتەپتە جۇرگەن كەزدە بايقاعانىن ايتتى.
«باسقا بالالار سياقتى بولعانىممەن، 6-سىنىپتا وقىپ جۇرگەندە دەنەمدەگى ەرەكشەلىكتى بايقاي باستادىم. ءبىرتۇرلى سۇيەكتەرىم وسە باستاعانداي سەزىلىپ، اياقتارىم ۇيىپ، تۇسىنىكسىز سەزىمدە بولدىم. كيىمدەرىم كىشكەنتاي بولا باستادى، بويىم تەز ءوسىپ، اياعىم ۇلكەيىپ كەتتى. 9-10-شى سىنىپ وقىپ جۇرگەنىمدە، اياق كيىم تابۋ پروبلەما بولدى. سەبەبى اياق كيىم ولشەمى 50-گە جەتتى. ال ونداي اياقكيىم تابۋ وتە قيىنعا سوقتى. مەكتەپتى بىتىرەردە سالماعىم 120 كيلوگرامم، ال بويىم 2 مەترگە جەتتى»، - دەيدى ول.
ءبىراق، دەنە ءبىتىمىنىڭ ەرەكشەلىگى پاراساتتىڭ دەنساۋلىعىندا ەش كىنارات تۋدىرماعان. ءقازىر ول اۋىل اراسىنداعى قۇرىلىس جۇمىستارىمەن اينالىسىپ ءجۇر، تۇراقتى جۇمىسى جوق.
«مەندە تۇراقتى جۇمىس جوق، كوبىنە ۇيلەردىڭ ىرگەتاسىنا لاي قۇيۋ، سىلاق سىلاۋ سەكىلدى جۇمىستارمەن اينالىسامىن. جۇمىستان شارشامايمىن، ءقازىر ءتورت ادام بولىپ ءۇيدىڭ ىرگەتاسىن قۇيىپ جاتىرمىز. ءوز ماماندىعىممەن جۇمىس جاساعان ەمەسپىن»، - دەيدى پاراسات.