بيىل اۆتوجول سالاسىندا بىرنەشە ماڭىزدى جوبانى اياقتاۋ كوزدەلگەن.
سولاردىڭ ءبىرى تۇركىستان وبلىسى شاقپاق بابا اسۋىنداعى قازاقستانداعى ەڭ ۇزىن اۆتوموبيل توننەلى (840 م) تامىز ايىندا پايدالانۋعا بەرىلەدى. توننەلدىڭ اشىلۋى قىس مەزگىلىندە جۇرگىزۋشىلەرگە كەدەرگىسىز جۇرۋگە مۇمكىندىك بەرەدى. بۇل تۋرالى پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا كولىك ءمينيسترى مارات قارابايەۆ باياندادى، دەپ حابارلايدى اlmaty-akshamy.kz.
ەكىنشى جوبا — الماتى اگلومەراسياسى ءۇشىن ترانزيتتىك ماڭىزى زور، ۇزىندىعى 6 شاقىرىمدى قۇرايتىن شامالعان ستانساسىنداعى اۆتوموبيل جول ايرىعى قىركۇيەك ايىندا ىسكە قوسىلادى.
ءۇشىنشىسى — ەلىمىزدىڭ ورتالىق جانە سولتۇستىك وڭىرلەرىن «باتىس جۇڭگو – باتىس ەۋروپا» دالىزىمەن بايلانىستىراتىن 262 شاقىرىمدىق «مەركە – بۋرىلبايتال» اۆتوجولى پايدالانۋعا بەرىلەدى.
ءتورتىنشى. شىعىس قازاقستانداعى بۇقتىرما سۋ قويماسى ارقىلى سالىنىپ جاتقان 1،3 مىڭ مەترلىك كوپىردىڭ قۇرىلىسىن دا وسى جىلى اياقتاۋ جوسپارلانعان. جاز مەزگىلىندە پاروم ارقىلى، قىس مەزگىلىندە مۇزدىڭ ۇستىمەن جۇرەتىن تۇرعىندار ءۇشىن كوپىردىڭ اشىلۋى ءقاۋىپسىز جول قوزعالىسىن قامتاماسىز ەتەدى.
«ول شىعىس قازاقستان وبلىسىنداعى 4 اۋداندى ءبىر بىرىمەن بايلانىستىرادى. بۇل تاريحي جوبا 60 جىلدان بەرى تالقىلانىپ كەلە جاتقان ەدى. ال ءقازىر جوبا مەملەكەت باسشىسىنىڭ ءتيىستى شەشىمىنىڭ ارقاسىندا ىسكە اسىرىلىپ، جىل سوڭىنا دەيىن حالىق يەلىگىنە تاپسىرىلاتىن بولادى»، - دەدى م. قارابايەۆ.
تاعى ءبىر جوبا – باتىس قازاقستاننىڭ شالعايىنداعى بوكەي ورداسى تۋريستىك ايماعىن دامىتۋ ماقساتىندا ۇزىندىعى 245 شاقىرىم بولاتىن «كازتالوۆكا – جانىبەك» جانە «ونەگە – بيسەن – سايقىن» اۆتوموبيل جولدارىنىڭ كۇردەلى جوندەۋ جۇمىستارى دا وسى جىلدىڭ سوڭىنا دەيىن تولىقتاي اياقتالاتىن بولادى.