28-29 قازاندا وتەتىن Digital Bridge-2021 حالىقارالىق فورۋم اياسىندا ءداستۇر بويىنشا ەلدىڭ ۇزدىك تەحنولوگيالىق ستارتاپتارى انىقتالادى، دەپ حابارلايدى almaty-akshamy.kz قازاقپاراتقا سىلتەمە جاساپ.
وسى جىلى Astana Hub Battle جارىسىنىڭ جۇلدەلىك قورى ءى ورىن ءۇشىن $10 مىڭ، ءىى ورىنعا $5 مىڭ جانە ءىىى ورىنعا $3 مىڭ قۇرايدى. ستارتاپتارعا قاتىسۋ ءۇشىن قويىلاتىن باستى شارتتار:
MVP نەمەسە MVO ساتىسىنداعى ەكسپورتقا شىعۋعا الەۋەتى بار جوبا، كوماندادا كەم دەگەندە 2 نەگىزگى ادامنىڭ بولۋى جانە جوبانىڭ نارىقتاعى تاجىريبەسى 2 جىلدان اسپاۋى ءتيىس. Astana Hub Battle-2021 بارىسى قانداي؟
- سايتتا سۇرانىم بەرگەن 100 باسەكەگە قابىلەتتى جوبا جارتىلاي فينالعا ءوتىپ، 28 قازاندا 1 مينۋتتىق پرەزەنتاسيامەن Digital Bridge الاڭىندا مامانداردىڭ الدىندا ءسوز سويلەيدى.
- قازىلار القاسىنىڭ شەشىمىمەن 29 قازاندا 10 ۇزدىك جوبا digitalbridge.kz باس ساحناسىندا ءوز جوباسى تۋرالى 3 مينۋتتىق پرەزەنتاسياسىن وتكىزەدى.
- ىرىكتەۋدىڭ ەكى كەزەڭىنىڭ ناتيجەلەرىمەن باتتل جۇلدەگەرلەرى انىقتالادى. Astana Hub تەحنوپاركىنىڭ باس ديرەكتورى ماعجان مادييەۆتىڭ ايتۋىنشا، ءىس-شارا بىرىنشىدەن، قازاقستانداعى ستارتاپ-ەكوجۇيەسىنىڭ جاڭا تالانتتارىن ايقىنداۋعا جانە جوبالار دامۋدىڭ جاڭا دەڭگەيىنە كوتەرىلۋىنە قولداۋ كورسەتۋ ءۇشىن ۇيىمداستىرىلدى.
«جىلدان جىلعا ستارتاپتار اراسىندا باسەكە ۇيىمداستىرۋ ارقىلى ءبىز بىرنەشە ماقساتتاردى كوزدەيمىز: ەكوجۇيەنىڭ جاڭا قاتىسۋشىلارىن تابۋ، وتاندىق ستارتاپ-مادەنيەتىن دارىپتەۋ جانە ەلدەگى تەحنولوگيالىق كاسىپكەرلىكتى دامىتۋ»، - دەيدى ماعجان مادييەۆ.
وتكەن جىلداردىڭ بايقاۋلارىنىڭ جەڭىمپازدارى بولىپ KidSecurity، Abscrypt، Antidolg، Smart Gas، WebTotem مەن Kompra اتاندى، ولار بۇگىنگى كۇنى قازاقستاندىق IT-نارىعىندا ءساتتى دامىپ، ءوز ونىمدەرىن شەتەلگە ەكسپورتتاۋدا.