ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ۇكىمەت وتىرىسىندا قازاقستان حالقىن جۇمىسپەن قامتۋ شارالارى تۋرالى ايتىپ بەردى، دەپ حابارلايدى almaty-akshamy.kz
ءوز ءسوزىنىڭ باسىندا مينيستر ەڭبەك نارىعىنىڭ نەگىزگى كورسەتكىشتەرىنىڭ وڭ سەرپىنىن اتاپ ءوتتى، بۇل ونىڭ 2020 جىلمەن سالىستىرعاندا بىرتىندەپ قالپىنا كەلگەنىن كورسەتەدى.
«ۇلتتىق ستاتيستيكا بيۋروسىنىڭ مالىمەتتەرىنە سايكەس، اعىمداعى جىلدىڭ ءىى توقساندا جۇمىس كۇشىنىڭ سانى 9،3 ملن. ادامدى قۇرادى. ونىڭ ىشىندە جۇمىسپەن قامتىلعاندار سانى 73 مىڭ ادامعا ارتتى. سالالار بويىنشا قىزمەت كورسەتۋ سالاسىنىڭ ۇلەسى باسىم، وندا ءوسىم 48 مىڭ ادامدى قۇرادى.
بۇدان باسقا، پاندەميا باستالعاننان بەرى ناتيجەسىز جۇمىسپەن قامتىلعاندار سانى 12،2%-دان 7،4%-عا دەيىن قىسقاردى، ال ناتيجەلى جۇمىسپەن قامتىلعان حالىق سانى 102 مىڭ ادامعا ۇلعايدى. جۇمىس بەرۋشىلەردىڭ باستاماسىمەن ۋاقىتشا جۇمىسپەن قامتىلماعاندار سانى 12،3 ەسەگە – 5 مىڭنان 400 ادامعا دەيىن ازايدى»، – دەدى ول.
سەرىك شاپكەنوۆ جۇمىسسىزدىق 4،9% دەڭگەيىندە ساقتالعانىن، ال جاستار اراسىنداعى جۇمىسسىزدىق دەڭگەيى، وتكەن جىلمەن سالىستىرعاندا، تومەندەپ، 3،7%-دى قۇراعانىن اتاپ ءوتتى.
ەڭبەكمينىنىڭ باسشىسى اعىمداعى جىلى جۇمىسپەن قامتۋ شارالارىمەن شامامەن 1،2 ملن ادامدى قامتاماسىز ەتۋ جوسپارلانعانىن، ونىڭ 700 مىڭى «ەڭبەك» مەملەكەتتىك باعدارلاماسى شەڭبەرىندە، 42 مىڭى جۇمىسپەن قامتۋدىڭ 2020-2021 جىلدارعا ارنالعان جول كارتاسى ارقىلى جانە 440 مىڭى جاڭا جۇمىس ورىندارىن قۇرۋ ارقىلى قامتاماسىز ەتىلەتىنىن اتاپ ءوتتى. بۇگىنگى تاڭدا 1 ميلليونعا جۋىق ادام حالىقتى جۇمىسپەن قامتۋدى قولداۋ شارالارىمەن قامتىلدى.
«اعىمداعى جىلدىڭ 9 ايىندا «ەڭبەك» مەملەكەتتىك باعدارلاماسى بويىنشا 377 مىڭ ادام جۇمىسقا ورنالاستىرىلدى، ولاردىڭ 70%-ى تۇراقتى جۇمىسقا تۇردى. بارلىعى 65 مىڭ ادام وقۋمەن قامتىلدى. بۇدان باسقا، كاسىپكەرلىكتى قولداۋ باعىتى بويىنشا 29 مىڭ ادام ميكروكرەديتتەر مەن وتەۋسىز گرانتتار الدى، ولاردىڭ 25 مىڭنان استامى ءوز ءىسىن العاش رەت اشىپ، قوسىمشا 8 مىڭعا جۋىق جاڭا جۇمىس ورىندارىن قۇردى. سولتۇستىك وڭىرلەرگە 5،5 مىڭ ادام قونىس اۋداردى، ولاردىڭ ىشىندە 2،3 مىڭ ادام ەڭبەككە قابىلەتتى جاستا. ونىڭ ىشىندە 1،8 مىڭ قونىس اۋدارۋشى جۇمىسقا ورنالاستىرىلدى.
وسىلايشا، Nur Otan پارتياسىنىڭ سايلاۋالدى باعدارلاماسىندا كوزدەلگەن «ەڭبەك» مەملەكەتتىك باعدارلاماسى 83%-عا ورىندالدى. اقمولا، قوستاناي، پاۆلودار، جامبىل وبلىستارىندا جانە نۇر-سۇلتان قالاسىندا بارلىق كورسەتكىشتەر تولىق كولەمدە ورىندالدى»، – دەدى سەرىك شاپكەنوۆ.
مينيستر «ەڭبەك» مەملەكەتتىك باعدارلاماسىنىڭ ماڭىزدى باعىتى قىسقا مەرزىمدى وقىتۋ بولىپ تابىلاتىنىن، ونى بيىل 13،2 مىڭ ادام اياقتاعانىن اتاپ ءوتتى. ونىڭ 81%-ى جۇمىسقا ورنالاستىرىلدى.
سونداي-اق، Nur Otan پارتياسىنىڭ سايلاۋالدى باعدارلاماسىمەن اعىمداعى جىلى ەلەكتروندىق ەڭبەك بيرجاسىندا پيلوتتىق رەجيمدە 5 مىڭ جۇمىسسىز ازاماتتى تەگىن ونلاين-وقىتۋمەن قامتاماسىز ەتۋ كوزدەلگەن، ونىڭ 93%-ى كۋرستارعا قاتىسىپ، سەرتيفيكاتتار الدى.
«ەلەكتروندىق ەڭبەك بيرجاسى بازاسىندا ازاماتتاردى ونلاين-وقىتۋدى ۇيىمداستىرۋ ءۇشىن 1 شىلدەدەن باستاپ جۇمىس ىستەي باستاعان ارنايى پورتال ازىرلەنىپ، ىسكە قوسىلدى. بۇگىنگى تاڭدا پورتالدا 135 كۋرس اۆتورى جانە 11 مىڭعا جۋىق قولدانۋشى تىركەلگەن. كۋرستاردىڭ جارتىسىنان استامى تەگىن جانە كەز كەلگەن قازاقستاندىق ءۇشىن قولجەتىمدى. ىسكە قوسىلعان ساتتەن باستاپ بارلىعى 6،6 مىڭ ادام وقىتۋدان ءوتتى، ونىڭ ىشىندە 4،8 مىڭى – تىركەلگەن جۇمىسسىزدار. كاسىپكەرلىكتى دامىتۋ بويىنشا جاڭا ۇلتتىق جوبا اياسىندا ەڭبەك نارىعىندا سۇرانىسقا يە ماماندىقتار بويىنشا ونلاين-وقىتۋدى پورتال ارقىلى دامىتاتىن بولامىز»، – دەپ اتاپ ءوتتى سەرىك شاپكەنوۆ.
مينيستر سونداي-اق ۇلتتىق جوبا اياسىندا كاسىپكەرلىكتى قولداۋ شارالارىن «ءبىر تەرەزە» قاعيداتى بويىنشا ونلاين-پورتال ارقىلى ۇسىنۋ كوزدەلىپ وتىرعانىن ايتتى.
«اۋدانداردىڭ ەكونوميكالىق ماماندانۋىن انىقتاۋ ءۇشىن 163 ماستەر-جوسپار ازىرلەنىپ، مەملەكەتتىك گرانتتار مەن ميكروكرەديتتەر وسى ماستەر-جوسپارلاردا قاراستىرىلعان باعىتتار بويىنشا ۇسىنىلاتىن بولادى. مەملەكەتتىك گرانتتار بەرۋ پروسەسى تولىعىمەن اۆتوماتتاندىرىلادى. بۇل ولاردى بەرۋ كەزىندە ادامي فاكتوردى بولدىرمايدى، وتىنىمدەردى قاراۋ مەرزىمىن ەداۋىر قىسقارتادى.
سونداي-اق، ۇلتتىق جوبا اياسىندا 2025 جىلعا دەيىن 150 مىڭ ادامدى كاسىپكەرلىك نەگىزدەرىنە وقىتۋ جوسپارلانۋدا، جاستار مەن حالىقتىڭ الەۋمەتتىك وسال توپتارى ءۇشىن 100 مىڭ جاڭا بيزنەس يدەيانى ىسكە اسىرۋ ءۇشىن قايتارىمسىز مەملەكەتتىك گرانتتار بەرۋ كوزدەلۋدە»، – دەدى ەڭبەكمينىنىڭ باسشىسى.
سونىمەن قاتار، سەرىك شاپكەنوۆ جۇمىسپەن قامتۋدىڭ 2020-2021 جىلدارعا ارنالعان جول كارتاسىن جۇزەگە اسىرۋ بارىسى تۋرالى ايتىپ ءوتتى. 225 جوبا بويىنشا جۇمىستار جۇرگىزىلۋدە، ولارعا 7،7 مىڭ ادام جۇمىسقا ورنالاستىرىلدى.
«وزگە مەملەكەتتىك باعدارلامالار مەن جەكە باستامالار اياسىندا بۇگىنگى تاڭدا 464 مىڭ جۇمىس ورنى قۇرىلدى، ونىڭ 56%-ى تۇراقتى بولىپ تابىلادى. بۇل جۇمىس ورىندارىنىڭ باسىم بولىگى «نۇرلى جەر»، «اۋماقتاردى دامىتۋ» باعدارلامالارى مەن جەكە باستامالار اياسىندا قۇرىلۋدا»، – دەدى مينيستر.
ەڭبەكمينىنىڭ باسشىسى سيفرلىق جۇمىسپەن قامتۋ ورتالىقتارىن ەنگىزۋ بويىنشا جۇرگىزىلىپ جاتقان جۇمىستار تۋرالى دا ايتتى.
«جىل باسىنان بەرى جۇمىسسىز رەتىندە تىركەۋ، جۇمىسىنان ايىرىلۋىنا بايلانىستى الەۋمەتتىك تولەمدەر تاعايىنداۋ جانە سۋبسيديالاناتىن جۇمىس ورىندارىنا جولداما بەرۋ قىزمەتتەرى ەلەكتروندىق ەڭبەك بيرجاسى ارقىلى تولىق اۆتوماتتاندىرىلدى. وسى ۋاقىت ىشىندە 122 مىڭنان استام ازامات جوعارىدا اتالعان قىزمەتتەردى ونلاين-رەجيمدە الدى. ونىڭ ىشىندە 44 مىڭ ادام پورتال ارقىلى جۇمىسقا ورنالاسۋ مۇمكىندىگىنە يە بولدى جانە 15 مىڭنان استام ادام جۇمىسىنان ايرىلۋىنا بايلانىستى الەۋمەتتىك تولەمدەر الدى.
2022 جىلى «باستاۋ بيزنەس» جوباسى بويىنشا پروسەستەردى اۆتوماتتاندىرۋ، مەملەكەتتىك گرانتتار، ميكروكرەديتتەر بەرۋ، جۇمىس ورنىندا جانە جۇمىس بەرۋشىنىڭ تاپسىرىسى بويىنشا وقىتۋ جۇرگىزۋ جوسپارلانۋدا. بۇل جۇمىسپەن قامتۋ سالاسىنداعى بارلىق قولداۋ شارالارىن اۆتوماتتاندىرۋدى 100%-عا دەيىن جەتكىزۋگە مۇمكىندىك بەرەدى»، – دەپ اتاپ ءوتتى سەرىك شاپكەنوۆ.
بايانداما سوڭىندا مينيستر ەڭبەك نارىعىنداعى وزگەرىستەردىڭ پەرسپەكتيۆالارى، پاندەميادان، جاڭا دەموگرافيالىق جاعدايدان جانە باسقا دا فاكتورلاردان تۋىنداعان جاڭا تالاپتار تۋرالى ايتتى.
«بىرىنشىدەن، جۇمىس كۇشىنە قويىلاتىن تالاپتار تەز وزگەرۋدە. ساراپشىلاردىڭ پىكىرىنشە، الداعى 5 جىلدا جۇمىس كۇشىنە قاجەتتى نەگىزگى داعدىلاردىڭ 40%-ى وزگەرەدى، وسىعان بايلانىستى ءاربىر ەكىنشى قىزمەتكەردى قايتا دايارلاۋ قاجەتتىلىگى تۋىندايدى.
ەكىنشىدەن، بۇل دەموگرافيالىق تاۋەكەلدەر. ونەركاسىپ سالاسىندا كادرلاردىڭ قارتايۋ پروسەسى ءجۇرىپ جاتىر. بۇل سالادا جۇمىس ىستەيتىندەردىڭ 20%-ى عانا جاستار. الداعى ۋاقىتتا جۇمىس كۇشىنىڭ 74%-ىن «ميللەنيالدار» جانە «Z» ءداۋىرىنىڭ وكىلدەرى قۇرايتىن بولادى.
جانە سوڭعىسى – جۇمىستىڭ جاڭا فورماتتارى. قازىرگى ۋاقىتتا «ەركىن تابىس ەكونوميكاسى» نەمەسە گيگ-ەكونوميكا، فريلانسەرلەر قارقىندى دامۋدا. ولاردىڭ قىزمەتىن زاڭنامالىق رەتتەۋ جانە ەڭبەك قۇقىقتارىن قورعاۋ بويىنشا شارالار قابىلداۋ قاجەت»، – دەدى سەرىك شاپكەنوۆ.
ول ەڭبەك سالاسىن بەيىمدەۋ ءۇشىن مينيسترلىك «كاسىپتىك بىلىكتىلىكتەر تۋرالى» زاڭ جوباسى، الەۋمەتتىك كودەكس جوباسى اياسىندا ۇلتتىق بىلىكتىلىك جۇيەسىن دامىتۋ، جۇمىس كۇشىن كاسىپتىك وقۋدان وتۋگە ىنتالاندىرۋ بويىنشا ءبىرقاتار باستامالاردى ىسكە اسىراتىنىن حابارلادى.
سونداي-اق، ەلەكتروندىق ەڭبەك بيرجاسى بازاسىندا ونلاين-وقىتۋ پورتالىن دامىتۋ، كاسىپتىك باعدارلاۋ بويىنشا ەلەكتروندىق سەرۆيستەردى قۇرۋ، يكەمدى جۇمىس رەجيمىندەگى قىزمەتكەرلەردى قولداۋ بويىنشا جۇمىس جۇرگىزىلۋدە.