بۇل تۋرالى بۇگىن ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حاباردايدى Almaty-akshamy.kz قازاقپاراتقا سىلتەمە جاساپ.
«زەرتتەۋ ەكوجۇيەسىن قالىپتاستىرۋ جانە سەرپىندى تەحنولوگيالاردى دامىتۋ ءۇشىن 3 جوعارى وقۋ ورنىن زەرتتەۋ جوو-لارعا اينالدىرۋ جوسپارلانعان. بۇل - ل.گۋميليەۆ اتىنداعى ەۇۋ، ءال-فارابي اتىنداعى قازۇۋ، م. اۋەزوۆ اتىنداعى وقمۋ-عا زەرتتەۋ ۋنيۆەرسيتەتى مارتەبەسى بەرىلدى»، - دەدى ساياسات نۇربەك.
ونىڭ دەرەگىنشە، ل.گۋميليەۆ اتىنداعى ەۇۋ-دى زەرتتەۋ ۋنيۆەرسيتەتىنە ترانسفورماسيالاۋ بويىنشا دامۋ باعدارلاماسى مەن قاۋلى جوباسى دايىندالدى. م.اۋەزوۆ اتىنداعى وقمۋ-دىڭ زەرتتەۋ ۋنيۆەرسيتەتىنە اۋىسۋى بويىنشا جۇمىستار جۇرگىزىلۋدە.
«ۇزدىكسىز ءبىلىم بەرۋدى قامتاماسىز ەتۋ ماقساتىندا ءومىر بويى وقىتۋ تۇجىرىمداماسى قابىلداندى. بەيرەسمي ءبىلىمدى تانۋدى قامتاماسىز ەتۋ ءۇشىن بىلىكتىلىكتىڭ ۇلتتىق شەڭبەرىن وزەكتەندىرۋ پىسىقتالۋدا»، - دەدى ول.
ءمينيستردىڭ اتاپ وتۋىنشە، اكادەميالىق ۇتقىرلىق باعدارلاماسى ىسكە اسقان 10 جىلدىڭ ىشىندە 17 000-نان استام قازاقستاندىق ستۋدەنت شەتەلدىك ارىپتەس جوعارى وقۋ ورىندارىندا ءبىلىم الدى. وسىلايشا، 2022 جىلدىڭ ءبىرىنشى جارتىجىلدىعىندا وسى باعدارلاما بويىنشا وقۋدان وتكەن ستۋدەنتتەر سانى - 2 320 ادامدى، 2021 جىلى 3 246 ادامدى قۇرادى.