ەلىمىزدە بيداي قورى جەتكىلىكتى جانە ۇننىڭ باعاسى ءسال تومەندەيدى دەپ بولجام بار.
بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇعان دەيىن كوكتەمدە، كۇزدە قازاقستاندا بيداي، ۇن تاپشىلىعى قاتتى سەزىلەدى دەگەن اڭگىمە شىققان ەدى. قازىرگى جاعداي قالاي؟ قىستا قازاقستاندا ۇن تاپشىلىعى بولماي ما؟ وسى بويىنشا قانداي ءىس-شارالار جۇرگىزىلىپ جاتىر؟»، - دەگەن سۇراق قويىلدى ۇكىمەتتەگى باسپا ءسوز ءماسليحاتىندا.
ەربول قاراشوكەيەۆ ءوز جاۋابىندا ەلدەگى بيداي قورى جەتكىلىكتى ەكەنىن، تاپشىلىققا ەش نەگىز جوقتىعىن ايتتى.
«ءوزىمىز ساناپ كورەيىكشى، بيىل 13،4 ملن توننا بيداي جينايمىز. بىلتىرعى بيدايدان 2،5 ملن توننا قالدىق قالدى. ونىڭ ىشىندە 360 مىڭ توننا بيداي «ازىق-تۇلىك كەلىسىمشارت» كورپوراسياسى قورىندا تۇر. بيدايدىڭ ەلدەگى تۇتىنىلىپ وتىرعان كولەمى – 6-7 ملن توننا. سوندىقتان الداعى ۋاقىتتا جينالاتىن بيداي مەن قورداعى بيدايدى ەسەپتەڭىز. ول تۇتىنىلاتىن بيدايدىڭ كولەمىنەن بىرنەشە ەسەگە اسىپ تۇر. سوندىقتان بيداي مەن ۇن تاپشىلىعى بولادى دەۋگە نەگىز جوق»، - دەدى اۋىل شارۋاشىلىعى ءمينيسترى.
مينيستر جوعارى ساناتتى ۇننىڭ باعاسى ءوسۋى مۇمكىن دەگەن ماسەلەگە دە توقتالدى.
«ءقازىر نارىقتا بيدايدىڭ باعاسى ارزانداپ جاتىر. ەكى-ەكى جارىم اي بۇرىن بيدايدىڭ باعاسى 175-180 تەڭگەگە دەيىن كوتەرىلگەن ەدى. ءقازىر رەسەي فەدەراسياسىنان بيداي ەكسپورتى اشىلىپ، ەلىمىزگە 1،2 ملن توننا بيداي ەكسپورتتالادى دەگەن بولجام بولدى. وزىمىزدە جانە وڭتۇستىكتە بيداي جيناۋ ناۋقانىن بىتىردىك. استىقتى جيناپ الدىق. ءقازىر سولتۇستىك وڭىرلەردە جاپپاي استىق جيناۋ ناۋقانى باستالدى. جوسپارىمىز دۇرىس. سوندىقتان بيدايدىڭ باعاسى 145-150 تەڭگەگە دەيىن تومەندەدى. وسىعان قاراماستان، ءبىز «ازىق-تۇلىك كەلىسىمشارت» كورپوراسياسى تاراپىنان ارزانداتىلعان بيدايدى وڭىرلەرگە جىبەرىپ جاتىرمىز. ول الەۋمەتتىك نان باعاسىن تۇراقتى ۇستاپ تۇرۋعا مۇمكىندىك بەرەدى. سوندىقتان جاعداي تۇراقتى. ءقازىر نارىقتىڭ ديناميكاسىنا قاراعاندا بيداي مەن ۇننىڭ باعاسى ءسال تومەندەيدى دەپ بولجام جاساپ وتىرمىز. سوندىقتان قازاقستانداعى بيدايدىڭ قورى جەتكىلىكتى. ۇنسىز قالمايمىز»، - دەدى ەربول قاراشوكەيەۆ.