تومەن كومىرتەكتى ستراتەگيانى دايارلاۋ بويىنشا جۇمىس ءجۇرىپ جاتىر
ەلوردادا جاسىل تەحنولوگيالار مەن تازا كومىر تەحنولوگيالارىن ەنگىزۋگە قاتىستى دوڭگەلەك ۇستەل وتىرىسى ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«حالىقارالىق جاسىل تەحنولوگيا جانە ينۆەستيسيالىق جوبالار ورتالىعى» كوممەرسيالىق ەمەس اكسيونەرلىك قوعامى ءتوراعاسىنىڭ مىندەتىن اتقارۋشى جانار يگەنوۆا الەمدەگى ەنەرگيا تەگەرىمىندە كومىردىڭ گەنەراسياسى رولىنە جايىندا توقتالدى. سونىمەن قاتار ول قازاقستاندا جاسىل تەحنولوگيالار باعىتىندا دامۋ ءۇشىن نەگىز بار ەكەنىن، «جاسىل» ەكونوميكاعا اۋىسۋ ءۇشىن ءتيىستى ساياسات جۇرگىزىلىپ جاتقانىن اتاپ ءوتتى. بۇل تۇرعىدا زياندى گازداردىڭ قورشاعان ورتاعا اسەرىن تومەندەتۋ ءۇشىن جوسپارلى جۇمىستار اتقارىلىپ جاتىر. «قازىرگى كەزدە تومەن كومىرتەكتى ستراتەگيانى دايارلاۋ بويىنشا جۇمىس ءجۇرىپ جاتىر جانە ول جىل سوڭىنا دەيىن قابىلدانۋى كەرەك. بۇل ءوز كەزەگىندە قازاقستاندا پارنيك گازدارىنىڭ تارالۋىن قىسقارتۋدىڭ الەۋەتىن ايقىندايدى. سونىمەن قاتار، وسى سالادا تەحنولوگيالىق شەشىمدەر مەن ينۆەستيسيالاردىڭ مۇمكىندىكتەرى قامتىلادى»، - دەدى ج. يگەنوۆا.
ءوز كەزەگىندە عۇماربەك داۋكەيەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىنىڭ پروفەسسورى اندرەي كيبارين كومىردى پايدالانۋعا قاتىستى ەكولوگيا ماسەلەلەرىن شەشۋ ءۇشىن جاڭا تەحنولوگيالاردى ەنگىزۋ كەرەك.
«قازاقستاندا كومىر قورى جەتكىلىكتى. سوندىقتان بىزدە تازا كومىر تەحنولوگيالارىن ەنگىزۋ ءۇشىن ۋاقىتىمىز بار. بۇل تۇرعىدا عىلىمي زەرتتەۋلەرگە ءمان بەرۋ كەرەك. ياعني كومىردەن گاز ءبولۋ، قايتا تۇزىلگەن حيميالىق زاتتاردى، ەنەرگيا قامتيتىن ونىمدەردى ءوندىرۋ بويىنشا كەڭ اۋقىمدى زەتتەۋلەرگە كىرىسكەن ماڭىزدى»، - دەدى اندرەي كيبارين.
كەزدەسۋ بارىسىندا وكىلەتتى ورگانداردىڭ جانە كومىر ونەركاسىبىنىڭ وكىلدەرى ەلىمىزدە «تازا» كومىر گەنەراسياسىن ەنگىزۋ مۇمكىندىگىن تالقىلادى.