زەينەتاقى مولشەرى ورتا ەسەپپەن 51%-عا دەيىن ارتتىرىلاتىن بولادى.
مەملەكەت باسشىسى قاسىم-جومارت توقايەۆتىڭ بيىلعى 1 قىركۇيەكتەگى قازاقستان حالقىنا جولداۋىندا زەينەتاقى جۇيەسىنىڭ تيىمدىلىگىن ارتتىرۋ بويىنشا جاڭا شارالار پاكەتى ۇسىنىلدى. ولاردى ىسكە اسىرۋ ماقساتىندا ق ر الەۋمەتتىك كودەكسىنىڭ جوباسى شەڭبەرىندە بازالىق زەينەتاقى مولشەرىن ارتتىرۋ جانە ىنتىماقتى زەينەتاقىنى ەسەپتەۋ ءۇشىن ەڭ جوعارى تابىستى ۇلعايتۋ كوزدەلەتىن بولادى. بۇعان دەيىن قابىلدانعان شەشىمدەرمەن بىرگە بۇل 2025 جىلعا قاراي جيىنتىق زەينەتاقىنى ورتا ەسەپپەن 27%-عا ۇلعايتۋعا مۇمكىندىك بەرەدى، دەپ حابارلايدى Almaty-akshamy.kz.
ەڭبەك مينيسترلىگىنىڭ مالىمەتى بويىنشا، بۇگىنگى تاڭدا وزگەرىستەر ناتيجەسىندە قازاقستاندا بازالىق جانە ىنتىماقتى زەينەتاقىنى، سونداي-اق بجزق-دان تولەنەتىن زەينەتاقى تولەمىن (قىزمەتكەردىڭ زەينەتاقى جيناقتارى ەسەبىنەن قالىپتاستىرىلادى) قامتيتىن كوپ دەڭگەيلى زەينەتاقى جۇيەسى قالىپتاستى.
ىنتىماقتى زەينەتاقى جۇيەسى بىرتىندەپ قىسقاراتىنى بەلگىلى، ويتكەنى ولاردى تاعايىنداۋ كەزىندە 1998 جىلعى 1 قاڭتارعا دەيىن، ياعني جيناقتاۋشى جۇيەسى ەنگىزىلگەنگە دەيىنگى ەڭبەك ءوتىلى ەسكەرىلەدى.
زەينەتاقى جۇيەسىنىڭ تيىمدىلىگىن ارتتىرۋ جانە ازاماتتاردى زەينەتاقىنىڭ ءتيىستى مولشەرىمەن قامتاماسىز ەتۋ ماقساتىندا الەۋمەتتىك كودەكس جوباسى شەڭبەرىندە مىناداي وزگەرىستەر ەنگىزۋ ۇسىنىلادى:
ءبىرىنشى. 2023-2027 جىلدار ارالىعىنداعى كەزەڭدە ەڭ تومەنگى بازالىق زەينەتاقىنىڭ مولشەرىن كەزەڭ-كەزەڭىمەن ەڭ تومەنگى كۇنكورىس دەڭگەيىنىڭ شاماسىنان 54-تەن 70%-عا دەيىن، ەڭ جوعارى مولشەرىن 100-دەن 120%-عا دەيىن جەتكىزۋ كوزدەلىپ وتىر.
وسى كەزەڭدە بازالىق زەينەتاقى مولشەرى ورتا ەسەپپەن 51%-عا دەيىن ارتتىرىلاتىن بولادى. بۇل رەتتە بازالىق زەينەتاقىنىڭ ورتاشا مولشەرىنىڭ جىل سايىنعى ءوسۋى شامامەن 13%-دى قۇرايدى جانە بارلىق 2 ملن زەينەتكەرگە قاتىستى بولادى.
ەكىنشى. 2023 جىلعى 1 قاڭتاردان باستاپ زەينەتكە شىعاتىن ازاماتتار ءۇشىن ىنتىماقتى زەينەتاقىلاردى ەسەپتەۋ ءۇشىن پايدالانىلاتىن ەڭ جوعارى تابىستىڭ شاماسىن 46-دان 55 ايلىق ەسەپتىك كورسەتكىشكە دەيىن ارتتىرۋ كوزدەلەدى.
ۇسىنىلىپ وتىرعان شارالار 2025 جىلعا قاراي جيىنتىق زەينەتاقىنى ورتا ەسەپپەن 27%-عا (3 جىل ىشىندە – 109-دان 138 مىڭ تەڭگەگە دەيىن) ارتتىرۋعا جانە جيىنتىق زەينەتاقىداعى مەملەكەتتىك تولەمدەردىڭ ۇلەس سالماعىن ارتتىرۋعا مۇمكىندىك بەرەدى. وسىلايشا، مەملەكەت قارت ادامدار اراسىندا كەدەيلىكتىڭ وسۋىنە جول بەرمەۋ بويىنشا مىندەتتەمەلەر قابىلدايدى.