حالىقتى الەۋمەتتىك قامسىزداندىرۋعا 4 ترلن تەڭگە قاراستىرىلعان.
زەينەتاقى مەن جاردەماقىنى ينفلياسياعا ساي يندەكستەۋ ءۇشىن قوسىمشا 111 ملرد تەڭگە بولىنەدى. بۇل تۋرالى ق ر پرەمەر-مينيسترىنىڭ ورىنباسارى ەرالى توعجانوۆ ءماجىلىس دەپۋتاتتارىنىڭ الدىندا مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«حالىقتى الەۋمەتتىك قامسىزداندىرۋعا 4 ترلن تەڭگە قاراستىرىلعان. ول بىلتىرعىمەن سالىستىرعاندا 230 ملرد. تەڭگەگە ارتىق. كەشە عانا رەسپۋبليكالىق بيۋدجەتتىك كوميسسيا ۇكىمەتپەن بىرگە وتە ماڭىزدى شەشىم قابىلدادى. ينفلياسيا ءدالىزىنىڭ 8-10% دەڭگەيىندە وزگەرۋىنە بايلانىستى زەينەتاقى مەن جاردەماقى مولشەرىن تاعى 4 پايىز يندەكستەۋ كوزدەلىپ وتىر. سونىڭ جيىنتىعىندا بارلىق الەۋمەتتىك تولەمدەر 2021 جىلمەن سالىستىرعاندا 9 پايىز، ال ىنتىماقتى زەينەتاقى مولشەرى 11 پايىز ارتادى»، - دەدى ەرالى توعجانوۆ.
ايتۋىنشا، اتالعان الەۋمەتتىك تولەمدەر قازاقستان بويىنشا 4،2 ملن. ادامدى قامتيدى.
«بۇل ماقساتقا ناقتىلانعان بيۋدجەت اياسىندا قوسىمشا 111 ملرد. تەڭگە قاراستىرىلدى»، - دەدى ۇكىمەت باسشىسىنىڭ ورىنباسارى.
ەسكە سالساق، ءماجىلىستىڭ جالپى وتىرىسىندا اتقارۋشىلىق ءىس جۇرگىزۋدى جەتىلدىرۋگە باعىتتالعان زاڭ ءبىرىنشى وقىلىمدا ماقۇلداندى.
سونداي-اق، ەرالى توعجانوۆ ءماجىلىس دەپۋتاتتارىنا ينفلياسيانى تەجەۋ باعىتىنداعى شارالار تۋرالى مالىمەت بەردى.