2025 جىلعا دەيىن 1000 مەكتەپ سالىنادى.
تەحنيكالىق جانە ءىت سالالارعا گرانتتار 60%-عا دەيىن وسەدى. بۇل تۋرالى ءماجىلىستىڭ جالپى وتىرىسىندا ق ر پرەمەر-مينيسترىنىڭ ورىنباسارى ەرالى توعجانوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەملەكەت باسشىسىنىڭ تاپسىرماسى بويىنشا 2025 جىلعا دەيىن 1000 مەكتەپ سالىنادى. بۇل ءۇش اۋىسىمدى جانە اپاتتى مەكتەپتەر پروبلەماسىن شەشۋگە جانە دەموگرافيالىق وسىمنەن تۋىندايتىن وقۋشى ورىندارىنا تاپشىلىقتى جويۋعا باعىتتالعان. قالا مەن اۋىل مەكتەپتەرى اراسىنداعى ءبىلىم ساپاسىنىڭ الشاقتىعىن جويۋ ءۇشىن مەكتەپتەردى مودەرنيزاسيالاۋ جالعاسۋدا. 2025 جىلعا قاراي سۇرانىسقا يە ماماندىقتار بويىنشا كوللەدجدە ءبىلىم الۋ 100% تەگىن بولادى. جوعارى وقۋ ورىندارىنا بەرىلەتىن گرانتتار سانى 75 مىڭعا دەيىن ۇلعايتىلادى. ونىڭ ىشىندە تەحنيكالىق جانە ءىت سالالارعا گرانتتار 60%-عا دەيىن وسەدى»، - دەدى ەرالى توعاجانوۆ.
سونىمەن قاتار ول ەكونوميكاعا ناقتى قاجەتتى كادرلار دايارلاۋعا باسىمدىق بەرىلەتىنىن ايتتى.
ايتا كەتەيىك، بۇگىن ءماجىلىستىڭ جالپى وتىرىسىندا وڭىرلەرگە شىعۋ بارىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىنا كەلىپ تۇسكەن ازاماتتاردىڭ وتىنىشتەرىن مەملەكەتتىك ورگانداردىڭ قاراۋ ناتيجەلەرى تالقىلانىپ جاتىر. دەپۋتاتتاردىڭ وڭىرلەرگە ساپارلارى بارىسىندا كوتەرىلگەن ەكى مىڭعا جۋىق سۇراق ۇكىمەت تاراپىنان جان-جاقتى ساراپتالىپ، قارالدى.