بۇل 4،4 ملن زەينەتاقى مەن جاردەماقى الۋشىعا اسەر ەتەدى.
2023 جىلدىڭ 1 قاڭتارىنان باستاپ قازاقستانداعى زەينەتكەرلەردىڭ جاردەماقىسى ارتتى، دەپ حابارلايدى Almaty-akshamy.kz.
«2023 جىلعى 1 قاڭتاردان باستاپ قازاقستاندا زەينەتاقى مەن جاردەماقىلاردىڭ بارلىق تۇرلەرىنىڭ مولشەرى ءوستى. بۇل 4،4 ملن زەينەتاقى مەن جاردەماقى الۋشىعا اسەر ەتەدى. وسى ماقساتتارعا رەسپۋبليكالىق بيۋدجەتتە 4،6 ترلن تەڭگە قاراستىرىلعان»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
بازالىق زەينەتاقىنىڭ مولشەرى ەڭ تومەنگى كۇنكورىس دەڭگەيىنىڭ جىل سايىنعى ۇلعايۋىن ەسكەرە وتىرىپ، سونداي-اق، مەملەكەت باسشىسىنىڭ تاپسىرماسىنا سايكەس، ونىڭ ەڭ تومەنگى مولشەرى ەڭ تومەنگى كۇنكورىس دەڭگەيىنىڭ 54%-دان 60%-عا دەيىن ۇلعايۋىنا بايلانىستى ارتتى.
ىنتىماقتى زەينەتاقى مولشەرى ينفلياسيا دەڭگەيىنەن 2%-عا ارتىپ كوتەرىلدى. بۇدان باسقا، مەملەكەت باسشىسىنىڭ تاپسىرماسىنا سايكەس، ىنتىماقتى زەينەتاقىنى ەسەپتەۋ ءۇشىن پايدالانىلاتىن ەڭ جوعارى تابىس مولشەرى 46-دان 55 اەك-كە دەيىن (158،7-دەن 189،8 مىڭ تەڭگەگە دەيىن) ۇلعايتىلدى.
ناتيجەسىندە بيۋدجەتتەن تولەنەتىن زەينەتاقى تولەمدەرىنىڭ ەڭ تومەنگى مولشەرى 68،2 مىڭ تەڭگەدەن 77،4 مىڭ تەڭگەگە دەيىن ءوستى. زەينەتاقىنىڭ ءوسۋى بارلىق 2،2 ميلليون زەينەتكەرگە اسەر ەتتى.
ەڭ تومەنگى كۇنكورىس دەڭگەيىنىڭ ۇلعايۋىنا بايلانىستى مۇگەدەكتىك جانە اسىراۋشىسىنان ايىرىلعان جاعدايدا تولەنەتىن جاردەماقىلاردىڭ مولشەرى دە ارتتى.
ايلىق ەسەپتىك كورسەتكىش (بۇدان ءارى – اەك) مولشەرىنىڭ ۇلعايۋىنا بايلانىستى تاعى دا ءبىرقاتار جاردەماقىلاردىڭ مولشەرى ءوستى.
ماسەلەن، جۇمىس ىستەيتىن دە، جۇمىس ىستەمەيتىن دە ايەلدەرگە بالا تۋۋعا بايلانىستى تولەنەتىن مەملەكەتتىك قولداۋدىڭ مولشەرى ەندى: ءبىرىنشى، ەكىنشى جانە ءۇشىنشى بالاعا 38 اەك نەمەسە 131 100 تەڭگە (2022 جىلى – 120 840 تەڭگە)، ءتورتىنشى جانە ودان دا كوپ بالاعا 63 اەك نەمەسە 217 350 تەڭگەنى (2022 جىلى - 200 340 تەڭگە) قۇرايدى.
رەسپۋبليكالىق بيۋدجەتتەن جۇمىس ىستەمەيتىن اتا-انالارعا بالا كۇتىمى بويىنشا جاردەماقى تاعايىندالادى، ونىڭ مولشەرى اەك ءوسۋىن ەسكەرە وتىرىپ، بيىلدان باستاپ 8،5%-عا ءوستى.
جۇمىس ىستەيتىن اتا-انالار بالا كۇتىمى بويىنشا الەۋمەتتىك تولەمدەردى مەملەكەتتىك الەۋمەتتىك ساقتاندىرۋ قورىنان الادى. 2023 جىلدان باستاپ پرەزيدەنت تاپسىرماسى بويىنشا بالا كۇتىمى بويىنشا تولەم مەرزىمى ءبىر جىلدان ءبىر جارىم جىلعا دەيىن ۇزاردى.
مۇگەدەكتىگى بار بالالاردى قولداۋ ءۇشىن قازاقستاندا كامەلەتكە تولعانعا دەيىن ارناۋلى مەملەكەتتىك جاردەماقى تولەنەدى. ونىڭ مولشەرى 2023 جىلى 56 794 تەڭگەنى (بۇرىن 52 345 تەڭگە) قۇرايدى.
جاڭا جىلدان باستاپ كوپ بالالى وتباسىلارعا ارنالعان جاردەماقى مولشەرى اەك ۇلعايۋىن ەسكەرە وتىرىپ ءوستى: 4 بالاسى بار وتباسىلارعا اي سايىن 55 304 تەڭگە (بۇرىن 50 976 تەڭگە)، 5 بالاعا – 69 138 تەڭگە (بۇرىن 63 728 تەڭگە)، 6 بالاعا – 82 973 تەڭگە (بۇرىن 76 479 تەڭگە)، 7 بالاعا – 96 807 تەڭگە (بۇرىن 89 231 تەڭگە)، 8 جانە ودان كوپ بالا بولسا ءار بالاعا – 13 800 تەڭگەدەن (بۇرىن 12 720 تەڭگە) بەرىلەدى.