قازاقستاندا سيفرلىق تەحنولوگيالار قۇقىق سالاسىنا بەلسەندى تۇردە ەنگىزىلۋدە. وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ادىلەت دەپارتامەنتىنىڭ باسشىسى بالايم كەسەبايەۆا مالىمدەگەندەي، ادىلەت مينيسترلىگى قۇقىقتىق قىزمەتتەردىڭ ساپاسى مەن قولجەتىمدىلىگىن ارتتىرۋعا باعىتتالعان «Digital Justice» باستاماسى اياسىندا ءبىرقاتار جوبالاردى جۇزەگە اسىرۋدا، دەپ حابارلايدى aqshamnews.kz
ماڭىزدى شەشىمدەردىڭ ءبىرى – «E-ZanKomegi» ءبىرىڭعاي قۇقىقتىق كومەك كورسەتۋ اقپاراتتىق جۇيەسىن قۇرۋ بولدى. بۇل جۇيە ءقازىردىڭ وزىندە 1949 ادۆوكات پەن زاڭگەرلىك كەڭەسشىلەردى بىرىكتىرەدى. 2023-2024 جىلدارى جۇيە ارقىلى 88 738 ءىس وڭدەلىپ، پورتال قولدانۋشىلارىنىڭ سانى 6 749 ادامعا جەتتى.
ازاماتتاردىڭ ىڭعايلىلىعى ءۇشىن «بەينەقوڭىراۋ» فۋنكسياسى ىسكە قوسىلدى، بۇل قۇقىقتىق قىزمەت وپەراتورلارىنان تاۋلىك بويى كەڭەس الۋعا مۇمكىندىك بەرەدى. بۇعان قوسا، «Zan Komegi» ءموبيلدى قوسىمشاسىندا جاساندى ينتەللەكت ەلەمەنتتەرى بار چات-بوت سىناقتان وتۋدە. جاڭا جي ءاربىر ءوتىنىشتىڭ ەرەكشەلىكتەرىن ەسكەرىپ، پايدالانۋشىلارعا جەكە ۇسىنىستار بەرەدى.
«ادىلەت مينيسترلىگى زاڭ قىزمەتتەرىن كورسەتۋگە ارنالعان پلاتفورمالاردى ازىرلەيتىن ەلدەگى جەتەكشى IT-كومپانيالار مەن ۋنيۆەرسيتەتتەر وكىلدەرىنەن جۇمىس توبىن قۇردى»، – دەپ اتاپ ءوتتى بالايم كەسەبايەۆا.
ماڭىزدى قادامداردىڭ ءبىرى – قازاق ۇلتتىق تەحنيكالىق ۋنيۆەرسيتەتىنە زاڭگەرلىك كەڭەس بەرۋ ءۇشىن جاساندى ينتەللەكت ازىرلەۋگە گرانت ءبولۋ بولدى. سونداي-اق، حالىققا قىزمەت كورسەتۋ ورتالىقتارىنا (حقكو) ۇقساس «زاڭ كلينيكالارىن» اشۋ جوسپارلانۋدا، وندا ازاماتتار تەگىن زاڭگەرلىك كومەك الا الادى.
سونىمەن قاتار، ءال-فارابي اتىنداعى قازاق ۇلتتىق ۋنيۆەرسيتەتىنىڭ سۋپەركومپيۋتەرى جاساندى ينتەللەكت جۇيەسىن قازاقستاننىڭ بارلىق اۋماعىندا ەنگىزۋگە مۇمكىندىك بەرەدى، بۇل ازاماتتارعا زاماناۋي قۇقىقتىق قىزمەتتەردى كەڭىنەن قولجەتىمدى ەتەدى.