قازاقستاندا قارىزداردى ءوندىرىپ الۋ بويىنشا اۆتوماتتاندىرىلعان جۇيە – سوت ورىنداۋشى روبوتى ىسكە قوسىلدى، دەپ حابارلايدى aqshamnews.kz.
بۇل جۇيە جەكە سوت ورىنداۋشىلاردىڭ (جسو) قىزمەت اقىسىن تولەۋگە كەتەتىن قوسىمشا شىعىنداردان قۇتىلۋعا مۇمكىندىك بەرەدى. بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ادىلەت دەپارتامەنتىنىڭ باسشىسى بالايم كەسەبايەۆا مالىمدەدى.
«2024 جىلدىڭ تامىز ايىندا ىسكە قوسىلعان ساتتەن باستاپ 2،2 ميلليارد تەڭگە سوماسىنا 109 مىڭ اتقارۋشىلىق ءىس قوزعالدى. جەكە سوت ورىنداۋشىلاردىڭ قىزمەت اقىسىن تولەۋدەن باس تارتۋدىڭ ارقاسىندا ازاماتتار 550 ميلليون تەڭگە ۇنەمدەدى، ال جىلدىق ۇنەمدەۋ 5 ميلليارد تەڭگەگە دەيىن جەتەدى دەپ كۇتىلۋدە»، – دەدى بالايم كەسەبايەۆا.
بۇرىن اتقارۋشىلىق ءىس قوزعالعان كەزدە بورىشكەرلەر جسو قىزمەتىن قوسىمشا تولەۋگە ءماجبۇر بولاتىن، بۇل قارىز سوماسىنىڭ 25%-ىنا دەيىن جەتەتىن. ەندى بۇل پروسەسس تولىق اۆتوماتتاندىرىلعان: ازاماتتار 5 كۇن ىشىندە ايىپپۇلدارسىز جانە سوت ورىنداۋشىلارىنا بارماي-اق قارىزىن ءوز ەركىمەن وتەي الادى.
روبوت اۆتوماتتى تۇردە اتقارۋشىلىق ءىس قوزعايدى جانە بورىشكەرلەردى SMS (1414) جانە EGov Mobile قوسىمشاسىنداعى push-حابارلامالار ارقىلى حاباردار ەتەدى. ەگەر قارىز وتەلمەسە، جۇيە تەك ءبىر عانا بانك شوتىنا تىيىم سالادى، ال بۇرىن جسو بورىشكەردىڭ بارلىق شوتتارىن بۇعاتتايتىن.
سيفرلىق سوت ورىنداۋشىسىنىڭ نەگىزگى ارتىقشىلىقتارىنا جسو قىزمەت اقىسىن تولىق جويۋ، بورىشكەرلەرگە ونلاين جۇيەلەر ارقىلى اۆتوماتتى حابارلاما جىبەرۋ، قارىزدى ونلاين تولەۋ ارقىلى شەكتەۋلەردى لەزدە الۋ، سونداي-اق قارىز ءوندىرىپ الۋ پروسەسىنەن ادامي فاكتوردى الىپ تاستاۋ جاتادى.