اسكەريلەردىڭ بۇل شاراسى 7 قازان كۇنى اياقتالادى.
قازاقستان اۋماعىندا ۇجىمدىق قاۋىپسىزدىك تۋرالى شارت ۇيىمىنىڭ "ءوزارا ءىس-قيمىل"، "ىزدەۋ" جانە "ەشەلون" وقۋ-جاتتىعۋلارى وتكىزىلۋدە، دەپ حابارلايدى Almaty-akshamy.kz.
وقۋ-جاتتىعۋلاردىڭ اشىلۋ سالتاناتىنا ۇقشۇ باس حاتشىسىنىڭ ورىنباسارى تاحير حايرۋللويەۆ، ۇقشۇ بىرىككەن شتابىنىڭ باستىعى گەنەرال-پولكوۆنيك اناتوليي سيدوروۆ، ۇيىمعا مۇشە ەلدەر قارۋلى كۇشتەرىنىڭ وكىلدەرى قاتىستى. قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى گەنەرال-لەيتەنانت مارات قۇسايىنوۆ وقۋ-جاتتىعۋلارعا قاتىسۋشىلاردى قۇتتىقتاي وتىرىپ، وڭىردەگى تۇراقتىلىق پەن قاۋىپسىزدىكتى قامتاماسىز ەتۋ ىسىندەگى جانە قاتىسۋشى مەملەكەتتەردىڭ اسكەري قىزمەتشىلەرىنىڭ كاسىبي شەبەرلىگىن ارتتىرۋداعى ۇيىمنىڭ ماڭىزدى ەكەنىن اتاپ ءوتتى.
«ۇجىمدىق قاۋىپسىزدىك تۋرالى شارت ۇيىمىنا مۇشە ەلدەر ستراتەگيالىق ارىپتەستەر مەن وداقتاستار، ال الداعى وقۋ-جاتتىعۋلار اسكەري قىزمەتشىلەردىڭ جاۋىنگەرلىك شەبەرلىگىن جانە ۇجىمدىق كۇشتەر بولىمشەلەرىنىڭ ۇيلەسىمدىلىگىن جەتىلدىرۋ قۇرالى رەتىندە عانا ەمەس، ونىمەن قوسا ءتيىمدى حالىقارالىق اسكەري ىنتىماقتاستىقتى، تاجىريبە الماسۋ باعىتىنداعى ءىس-قيمىلدى جەتىلدىرۋ ۇلگىسى»، – دەدى گەنەرال-لەيتەنانت مارات قۇسايىنوۆ.
ۇيىمنىڭ وقۋ-جاتتىعۋلارىنىڭ بەلسەندى كەزەڭى 2022 جىلعى 3-7 قازان ارالىعىندا وتەتىنىن ايتا كەتەلىك.