قازاقستاندا ۇلتتىق سپورت ستۋدەنتتەر ليگاسى قۇرىلادى. بۇل تۋرالى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ Egemen Qazaqstan گازەتىنە بەرگەن سۇحباتىندا ايتتى، دەپ حابارلايدى aqshamnews.kz
الدىمەن يسلامبەك سالجانوۆ جاستاردى ۇلتتىق سپورت تۇرلەرىمەن شۇعىلدانۋىنا قولداۋ كورسەتكەن تۋريزم جانە سپورت ءمينيسترى ەرمەك مارجىقپايەۆتىڭ ەڭبەگىن اتاپ ءوتتى. سونداي-اق قاۋىمداستىق باسشىسى ستۋدەنتتەر ءۇشىن ارنايى ليگا قۇرىلاتىنىن جەتكىزدى.
تاعى دا اقجولتاي جاڭالىعىمىز، ۇلتتىق سپورتتى ستۋدەنتتەر اراسىندا ايگىلەۋ ماقساتىندا جاستاردىڭ ۇسىنىسىمەن «ۇلتتىق سپورت ستۋدەنتتەر ليگاسىن» قۇرۋ جوسپارلانىپ وتىر. بۇل جوبا بويىنشا عىلىم جانە جوعارى ءبىلىم مينيسترىمەن كەزدەسۋ ءوتىپ، تۋريزم جانە سپورت مينيسترلىگىمەن دە كەلىسىم ءجۇرىپ جاتىر. قازاقستاندا 100-دەن اسا ۋنيۆەرسيتەت بار. ول جەردە 500 مىڭنان اسا ستۋدەنت ءبىلىم الىپ جاتىر. وسى جوبا اياسىندا جاستارىمىزدى ۇلتتىق سپورتقا تارتۋ كوزدەلىپ وتىر، - دەدى يسلامبەك سالجانوۆ.
سونداي-اق قاۋىمداستىق پرەزيدەنتى بۇگىندە توعىزقۇمالاق پەن ساداق اتۋ بۇقارالىق سيپاتقا يە بولعانىن جەتكىزدى.
«ساداق اتۋ فەدەراسياسى قۇرىلعانىمەن، كلۋبتىق دەڭگەيدە اركىم ءوز كۇنىن ءوزى كورىپ كەلگەن. 2022 جىلى بارلىق كلۋبتىڭ باسىن بىرىكتىرىپ، ەل چەمپيوناتى ۇيىمداستىرىلدى. سول ءىس-شاراعا 183 ساداقشى مەرگەن قاتىسسا، بۇگىندە ساداق اتۋمەن كاسىبي تۇردە شۇعىلدانۋشىلار قاتارى 5 مىڭعا جەتتى. ءقازىر ساداق اتۋ سپورتىنىڭ دامۋى، تارالۋ كوكجيەگى قارقىن الىپ كەلەدى. مىسالى، تۇركيا ساداقشىلار اراسىندا Fetih Kupası (جەڭىس كۋبوگى) حالىقارالىق تۋرءنيرىن ۇيىمداستىرادى. 10 جىلدان بەرى تۇراقتى تۇردە ءوتىپ كەلە جاتقان سايىسقا الەمنەن مىڭعا تارتا مەرگەن قاتىسادى. تۇرىك ستيلىمەن وتەتىن دودادا ساداقشىلار ادىرناسىن كەرە جەبەسىن الىستاعى نىساناعا اتۋدان تارتىسقا تۇسەدى. مىنە، وسى ايتۋلى دودادا استانالىق ساداقشى ايكوركەم باتيحان چەمپيون اتاندى»، - دەدى ول.
يسلامبەك سالجانوۆ «ءداستۇرلى ساداق اتۋ» رەسپۋبليكالىق فەدەراسيا باسشىسى ايدوس مۇقاتايەۆتىڭ جۇمىسىنا وڭ باعا بەردى.
جاستارىمىز الدىڭعى بۋىن اعالارىنا ەلىكتەپ، سولار شۇعىلداناتىن سپورتقا ءۇيىر كەلەتىنىن كورىپ ءجۇرمىز. ساداق اتۋعا جاستارىمىزدىڭ قىزىعۋىنا الەۋمەتتىك جەلىنى ءتيىمدى پايدالاناتىن مەملەكەتتىك كەڭەسشى ەرلان قارينءنىڭ ساداق اتۋمەن اينالىساتىنى بەلگىلى ءبىر دارەجەدە ءوز سەپتىگىن تيگىزدى، - دەدى قاۋىمداستىق باسشىسى.
ول توعىزقۇمالاق ويىنى دا جوعارى قارقىنمەن دامىپ جاتقانىن اتاپ ءوتتى.
«بۇل باعىتتا تاجىريبەسى مول، ءوز ءىسىنىڭ مامانى، قوعام جانە مەملەكەت قايراتكەرى ءاليحان بايمەنوۆتىڭ ەڭبەگىن اتاپ وتكەن ءجون. ءاليحان مۇحامەديا ۇلى جۇرگىزىپ وتىرعان جۇيەلى جۇمىسىنىڭ ناتيجەسىندە بۇگىندە ەلىمىزدە توعىزقۇمالاقپەن 200 مىڭعا جۋىق ادام شۇعىلدانسا، 30 ەلدە رەسمي وكىلدىكتەرى قۇرىلعان.
الەمنىڭ 50 مەملەكەتىنە توعىزقۇمالاق تارالىپ وتىر. ال جالپى بولاشاقتا ۇلتتىق سپورتىمىزدىڭ وليمپيادا ويىندارىنا ۇسىنۋعا سۇرانىپ تۇرعان سپورت تۇرلەرى بار. بۇل – «اۋدارىسپاق» پەن «جامبى اتۋ». بۇل شارۋانى كوشپەلىلەر ويىندارىن امان-ەسەن وتكىزىپ العان سوڭ ارنايى تالقىلاۋلار وتكىزۋگە قۇجاتتارىمىزدى ازىرلەپ جاتىرمىز. ۇلتتىق وليمپيادا كوميتەتىنىڭ باسشىسى گەنناديي گولوۆكينمەن جۇمىس جۇرگىزىپ جاتىرمىز، - دەدى يسلامبەك سالجانوۆ.