قازاقستاندا تىيىم سالىنعان اۆتورلاردىڭ جەكە ءتىزىمى جۇرگىزىلمەيدى. بۇل تۋرالى ىشكى ىستەر مينيسترلىگى اگەنتتىكتىڭ رەسمي ساۋالىنا بەرگەن جاۋابىندا مالىمدەدى، دەپ حابارلايدى aqshamnews.kz.
مينيسترلىكتىڭ تۇسىندىرۋىنشە، ەسەپكە اۆتورلار ەمەس، سوت شەشىمىمەن ەل اۋماعىندا ساقتاۋعا، اكەلۋگە، تاسىمالداۋعا جانە تاراتۋعا تىيىم سالىنعان ماتەريالدار عانا ەنگىزىلەدى. مۇنداي ماتەريالداردىڭ ءتىزىمى ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ رەسمي سايتىندا جاريالانىپ وتىرادى. بۇدان بولەك، مەملەكەتتىك ورگانداردىڭ ءبىرىڭعاي ينتەرنەت-رەسۋرستارى ارقىلى ءدىني ساراپتامادان وڭ قورىتىندى العان ماتەريالدار تۋرالى اقپارات توقسان سايىن جاڭارتىلادى.
ءدىني ادەبيەتتى تاراتۋ ەرەجەلەرى
“ءدىني قىزمەت جانە ءدىني بىرلەستىكتەر تۋرالى” زاڭنىڭ 9-بابىنا سايكەس، ءدىني ادەبيەتتەر مەن ماتەريالداردى تەك بەلگىلى ءبىر ورىنداردا تاراتۋعا رۇقسات ەتىلەدى:
• قۇلشىلىق عيماراتتارىندا (عيبادات ۇيلەرىندە)؛
• ءدىني ءبىلىم بەرۋ مەكەمەلەرىندە؛
• جەرگىلىكتى اتقارۋشى ورگاندار ارنايى بەلگىلەگەن تۇراقتى ءۇي-جايلاردا.
ءدىني ادەبيەتتى ەلگە اكەلۋ كەزىندە (جەكە قولدانۋعا ارنالعان ءبىر دانادان باسقا) تەك تىركەلگەن ءدىني بىرلەستىكتەرگە جانە ءدىني ساراپتامانىڭ وڭ قورىتىندىسىن العاننان كەيىن عانا رۇقسات بەرىلەدى.
ءدىني ساراپتاما قالاي جۇرگىزىلەدى؟
ءدىني ساراپتامانى قازاقستاندا مادەنيەت جانە اقپارات مينيسترلىگىنىڭ ءدىن ىستەرى كوميتەتى جۇزەگە اسىرادى. ساراپتاما تاعايىنداۋدىڭ نەگىزگى سەبەپتەرى:
• جەكە نەمەسە زاڭدى تۇلعالاردىڭ وتىنىشتەرى؛
• ءدىني ادەبيەتتىڭ كىتاپحانا قورلارىنا ءتۇسۋى؛
• ميسسيونەر رەتىندە تىركەلۋ جانە ءدىني بىرلەستىكتەردى تىركەۋ كەزىندە؛
• ءدىني مازمۇنداعى ماتەريالداردى ەلگە اكەلۋ جاعدايىندا؛
• قىزمەتتىك بۇيرىق نەگىزىندە؛
• ءدىني مازمۇنداعى ماتەريالداردى شىعارۋ، دايىنداۋ نەمەسە تاراتۋ كەزىندە.
ساراپتاما ناتيجەلەرى ءدىن ىستەرى كوميتەتىنىڭ رەسمي سايتىندا جاريالانادى.
زاڭ بۇزعاندارعا قانداي جازا قاراستىرىلعان؟
ءدىني ماتەريالداردى ساراپتاماسىز ازىرلەپ نەمەسە تاراتقان جاعدايدا ق ر اكىمشىلىك قۇقىق بۇزۋشىلىق تۋرالى كودەكسىنىڭ 490-بابى 1-بولىگى 3) تارماقشاسىنا سايكەس جاۋاپكەرشىلىك كوزدەلگەن:
• جەكە تۇلعالار ءۇشىن — ەسكەرتۋ نەمەسە 25 اەك كولەمىندە ايىپپۇل؛
• زاڭدى تۇلعالار ءۇشىن — 100 اەك كولەمىندە ايىپپۇل سالىنادى.
بۇعان دەيىن مادەنيەت جانە اقپارات مينيسترلىگىنىڭ ءدىن ىستەرى كوميتەتى قازاقستانداعى مەدرەسەلەردىڭ قىزمەتىن رەتتەۋ تارتىبىنە دە تۇسىنىكتەمە بەرگەن بولاتىن.