ءوندىرىس كولەمى 7،6 پايىزعا ارتقان.
2022 جىلدىڭ العاشقى جارتىجىلدىعىنىڭ قورىتىندىسى بويىنشا، ەلىمىزدەگى وڭدەۋ ونەركاسىبى سالاسىندا وڭ ءۇردىس بايقالۋدا. اتاپ ايتقاندا، بيىل ءتۇستى مەتاللۋرگيا ءوندىرىسىنىڭ كولەمى 7،6 پايىزعا ارتقان، دەپ حابارلايدى Almaty-akshamy.kz.
مامانداردىڭ ايتۋىنشا، رافينادتالعان مىس، التىن قۇيمالارى، كۇمىس تۇيىرشىكتەرى، تازارتىلعان التىن مەن كۇمىس، رافينادتالعان قورعاسىن جانە كاتودتى مىس ءوندىرۋ كولەمى وسكەن.
«كوپتەگەن كاسىپورىنداردا ونەركاسىپتى مودەرنيزاسيالاۋ بويىنشا جۇمىستار جۇرگىزىلىپ، جاڭا جوبالار ىسكە قوسىلۋدا. ماسەلەن، «التىنالماس اك» اق كومپانياسى جامبىل وبلىسىنداعى «اقباقاي» التىن كەن ورنىنىڭ وندىرىستىك الاڭدارىندا مودەرنيزاسيا جۇزەگە اسىرۋدا. وسىعان وراي كەن بارلاۋ جۇمىستارىندا پايدالانىلاتىن قۇرال-جابدىقتار جاڭارتىلىپ، ديىرمەن قۇرىلىسى اياقتالدى جانە قاجەتتى تەحنيكالار ساتىپ الىندى. سونداي-اق «سيفرلىق كەن ورنى» جوباسىن وندىرىسكە ەنگىزۋ اياسىندا SCADA قاشىقتان باسقارۋ باعدارلاماسى قولدانىلماق»، - دەلىنگەن يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
سونىمەن قاتار فازا-2 التىن الۋ فابريكاسىن ىسكە قوسۋ دا كوزدەلىپ وتىر. اتالعان كاسىپورىن التىن رۋدالارىن قايتا وڭدەۋدى جىلىنا 1،2 ملن تونناعا دەيىن ارتتىرۋعا مۇمكىندىك بەرمەك. سايكەسىنشە، جىلىنا التىن ءوندىرىسى كولەمى 13 پايىزعا ارتپاق.
سونداي-اق «التىنالماس» كومپانياسى قورشاعان ورتانى قورعاۋعا دا ءوز ۇلەسىن قوسۋدا. كاسىپورىن بالامالى قۋات كوزدەرى ارقىلى پارنيكتىك گازدار شىعارىندىلارىن ازايتىپ، اۋاعا بولىنەتىن كومىرقىشقىل گازىنىڭ مولشەرىن ازايتۋدا. كاسىپورىنعا تيەسىلى قاراعاندى وبلىسىنداعى كەن ورىندارىندا كۇن ساۋلەسى ارقىلى قۋات الاتىن ارنايى باعاندار ورناتىلدى. ولار بىر-بىرىنەن جارتى شاقىرىم قاشىقتىقتا ورنالاسقان. جالپى اۋماعى 10،85 شاقىرىمدى قۇرايدى.