2025 جىلدىڭ 1 قاڭتارى مەن 1 ناۋرىزى ارالىعىندا شەتەلدە دەمالۋ ءۇشىن 178 مىڭنان استام قازاقستاندىق شەكارا اسقان، دەپ حابارلايدى aqshamnews.kz.
ارينە، شەتەلدە دەمالۋشىلار قاتارىنىڭ ارتىپ جاتقانىن بايقاعان الاياقتار بىردەن وسى جاقتان اقشا تابۋدىڭ جولىن ىزدەدى. وسىعان بايلانىستى شەتەلدە دەمالۋشى رەتىندە باراتىن بولساڭىز تۋراگەنتتىكتەرمەن كەلىسۋ كەزىندە اسا مۇقيات بولۋدى ەسكەرتەدى تۋريزم جانە سپورت مينيسترلىگى.
«تۋريستىك قامقور» جۇيەسىنىڭ اكىمشىلىگى شەتەلگە شىعۋ تۋريزمىندەگى ازاماتتاردىڭ قۇقىقتارىن قورعاۋ سالاسىنداعى زاڭنامانى ەسكە سالدى. اتاپ ايتقاندا، قازاقستان رەسپۋبليكاسىنىڭ تۋريستىك قىزمەت تۋرالى زاڭىنا سايكەس، تۋريستىك پاكەت جاساۋ قۇقىعى تەك ليسەنزياسى بار، تۋروپەراتورلىق قىزمەتتى جۇزەگە اسىراتىن جانە جۇيەگە كەپىلدىك بەرۋشى ۇيىمداردىڭ مۇشەسى بولىپ تابىلاتىن تۋروپەراتورلارعا بەرىلەدى.
«تۋريستىك پاكەت تۋريستكە تۋروپەراتور تاراپىنان ساتىلۋى ءتيىس. ال تۋريستەردى ساتۋ، كەڭەس بەرۋ جانە جۇرگىزۋ قىزمەتتەرى تەك تۋريستىك اگەنتتىكتەرگە جۇكتەلگەن. بۇل دەگەنىمىز، تۋريستىك اگەنتتىك وزدىگىنەن تۋريستىك پاكەت جاساۋمەن اينالىسا المايدى»، – دەلىنگەن حابارلامادا.
مينيسترلىك ازاماتتاردى مۇقيات بولۋعا جانە تەك رەسمي تۋروپەراتورلار مەن تۋريستىك اگەنتتىكتەردىڭ قىزمەتتەرىنە سەنۋگە شاقىرادى.