جۋىردا «تۇراقتى دامۋ ماقساتتارى: ساپالى ءبىلىم» اياسىندا يبن حالدۋن (تۇركيا) جانە ءال-فارابي اتىنداعى قازاق ۇلتتىق ۋنيۆەرسيتەتى تۇرىكتانۋ جانە شىعىس ەلدەرىنىڭ تاريحى كافەدراسىنىڭ پروفەسسور-وقىتۋشى قۇرامىنىڭ بىرلەسە ۇيىمداستىرۋىمەن جوو-نىڭ تۇرىك ءتىلى وقىتۋشىلارىنا ارنالعان «قازاقستاندا تۇرىك ءتىلىن وقىتۋ ادىستەمەسى» اتتى ءبىر ايلىق حالىقارالىق بىلىكتىلىكتى ارتتىرۋ سەمينارى وتكىزىلدى.
اتالمىش سەميناردىڭ العاشقى 3 اپتاسى ونلاين فورماتتا ءوتىپ، سوڭعى 1 اپتاسى شىعىستانۋ فاكۋلتەتى تۇرىكتانۋ جانە شىعىس ەلدەرىنىڭ تاريحى كافەدراسىنىڭ بازاسىندا وفلاين فورماتتا جالعاستى.
سەمينار تۇرىك ءتىلى وقىتۋشىلارىنىڭ اقپاراتتىق-كوممۋنيكاتيۆتى تەحنولوگيالاردى قولدانۋ، جاساندى ينتەللەكتىڭ مۇمكىندىكتەرىمەن تانىستىرۋ، تۇرىك ءتىلىن وقىتۋ ۇدەرىسىندە ستۋدەنتتەردىڭ سوزدىك قورىن بايىتۋ جانە نەگىزگى تىلدىك داعدىلارىن دامىتۋ بويىنشا بىلىكتىلىكتەرىن ارتتىرۋ ماقساتىندا ۇيىمداستىرىلدى.
سەمينار-ترەنينگتە يبن حالدۋن، ستامبۋل، گازي (انكارا) جانە ءال- فارابي اتىنداعى قازاق ۇلتتىق ۋنيۆەرسيتەتتەرى مەن يۋنۋس ەمرە ينستيتۋتى پروفەسسورلارى مەن وقىتۋشىلارى مازمۇندى سەمينارلار وتكىزىپ، تۇرىك ءتىلىن ءتيىمدى وقىتۋعا ىقپال ەتەتىن زاماناۋي تەحنولوگيالار مەن شەت ءتىلىن وقىتۋدى سيفرلاندىرۋ بويىنشا وزىق پەداگوگيكالىق تاجىريبەلەرىمەن ءبولىستى.
اتالمىش سەمينارعا ءال- فارابي اتىنداعى قازاق ۇلتتىق ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، قازاق ۇلتتىق قىزدار پەداگوگيكالىق ۋنيۆەرسيتەتى جانە ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ پروفەسسور-وقىتۋشىلار قۇرامى قاتىسىپ، بىلىكتىلىكتەرىن ارتتىردى. وقىتۋشىلار سەمينار سوڭىندا تەست تاپسىرىپ، اشىق ساباقتار وتكىزدى.
سەمينار جوعارى دەڭگەيدە جانە مازمۇندى ءوتتى. سەمينارعا قاتىسۋشىلار سەمينار-ترەنينگ وتكىزگەن پروفەسسورلار مەن وقىتۋشىلارعا، سەميناردى ۇيىمداستىرۋشى يبن حالدۋن اتىنداعى ۋنيۆەرسيتەت (تۇركيا) پەن ءال-فارابي اتىنداعى قازاق ۇلتتىق ۋنيۆەرسيتەتى تۇرىكتانۋ جانە شىعىس ەلدەرىنىڭ تاريحى كافەدراسىنىڭ پروفەسسور-وقىتۋشى قۇرامىنا العىستارىن ءبىلدىردى.
شىعىستانۋ فاكۋلتەتىنىڭ دەكانى ناتاليا بوريسوۆنا ەم بىلىكتىلىكتى ارتتىرۋ سەمينارىن جوعارى دەڭگەيدە ۇيىمداستىرعان ءال-فارابي اتىنداعى قازاق ۇلتتىق ۋنيۆەرسيتەتى تۇرىكتانۋ جانە شىعىس ەلدەرىنىڭ تاريحى كافەدراسىنىڭ پروفەسسور م.ا.، PhD ءقۇرمانالى التىنشاش ارىستانبەك قىزى مەن يبن حالدۋن ۋنيۆەرسيتەتىنىڭ وقىتۋشىلارى گۇل گونۇلتاش سيەۆينچگيل، فۋركان الپات، حارۋن اكسۋ، رۋمەيسا شيشمان، مەليكە نۋر چەپ، مەرديە مانسۋر، سۋمەيرا بوزكۋرت كاحريمان جانە شۋرا فايزييەۆتى العىس حاتتارمەن ماراپاتتادى.
سەميناردىڭ جابىلۋ سالتاناتتى جيىنىندا «تۇرىكتانۋ جانە شىعىس ەلدەرىنىڭ تاريحى» كافەدراسىنىڭ مەڭگەرۋشىسى م. ش. ەگامبەردييەۆ بىلىكتىلىكتى ارتتىرۋ سەمينارىنىڭ قازاقستاندا تۇرىك ءتىلىن وقىتۋدىڭ ساپاسىن ارتتىرۋعا قوساتىن وزىندىك ۇلەسىنە نازار اۋدارىپ، وسىنداي ءىس-شارالاردىڭ تۇرىك ءتىلىن وقىتۋدىڭ ءتيىمدى ادىستەرىن مەڭگەرتۋمەن قاتار، ەكى باۋىرلاس ەل اراسىنداعى مادەني جانە عىلىمي ىنتىماقتاستىقتى نىعايتۋداعى ماڭىزدىلىعىنا توقتالدى.
يبن حالدۋن اتىنداعى ۋنيۆەرسيتەتتىڭ (تۇركيا) «تۇرىك جانە شەتەل تىلدەرىن وقىتۋ جانە زەرتتەۋ» ورتالىعىنىڭ ديرەكتورى فۋركان الپات وسى ءبىر ايلىق سەمينار بارىسىندا جوو-نىڭ تۇرىك ءتىلى وقىتۋشىلارىنىڭ تۇرىك ءتىلىن وقىتۋدىڭ يننوۆاسيالىق ادىس-تاسىلدەرىن قولدانۋ، تۇرىك ءتىلىن شەتەل ءتىلى رەتىندە وقىتۋ ۇدەرىسىندە وقۋ ماتەريالدارىن ازىرلەۋ جانە زاماناۋي اقپاراتتىق-كوممۋنيكاتيۆتى تەحنولوگيالار مەن جاساندى ينتەللەكتى قولدانۋ بويىنشا بىلىكتىلىكتەرىن ارتتىرعانىن تىلگە تيەك ەتتى. فۋركان الپات مىرزا مۇنىمەن قاتار، سەميناردىڭ جوعارى دەڭگەيدە ۇيىمداستىرىلعانىن باسا ايتىپ، قازاقستاندىق تۇرىك ءتىلى وقىتۋشىلارىنىڭ كاسىبيلىگىن جانە ستۋدەنتتەردىڭ تۇرىك ءتىلىن جوعارى دەڭگەيدە مەڭگەرگەنىن اتاپ ءوتتى.
سەميناردىڭ جابىلۋ سالتاناتىندا بىلىكتىلىكتى ارتتىرۋ سەمينارىن تابىستى اياقتاعان جوو-نىڭ تۇرىك ءتىلى وقىتۋشىلارىنا 80 ساعاتتىق حالىقارالىق سەرتيفيكات تابىستالدى.
اتالمىش سەمينار قازاقستاندا تۇرىك ءتىلىن وقىتۋ ۇدەرىسىندە جاڭا مۇمكىندىكتەر اشىپ، ءتىل ماماندارىنىڭ كاسىبي دەڭگەيىن ارتتىرۋمەن قاتار، باۋىرلاس ەكى ەل اراسىنداعى دوستىقتىڭ جارقىن كورىنىسى بولدى. سەمينار ءبىلىم بەرۋ سالاسىندا تاجىريبە الماسۋمەن قاتار، قازاقستان مەن تۇركيا اراسىنداعى مادەني جانە عىلىمي بايلانىستاردى نىعايتۋدا ماڭىزدى قادامدارعا جول اشتى. سەمينار بارىسىنداعى تۇرىك ءتىلىن وقىتۋ بويىنشا تاجىريبە الماسۋ جانە تۇرىك ءتىلىن شەتەل ءتىلى رەتىندە وقىتۋدىڭ وزەكتى ماسەلەلەرىن تالقىلاۋ ىسپەتتى ءىس-شارالار باۋىرلاس ەكى ەل اراسىنداعى ىنتىماقتاستىقتى جاڭا دەڭگەيگە كوتەرىپ، بولاشاق ورتاق عىلىمي-زەرتتەۋ جانە ادىستەمەلىك جوبالارىنا ۇيىتقى بولدى دەگەن سەنىمدەمىز.