تۇقىم شارۋاشىلىعى بويىنشا باستاپقى دەرەكتەر بازاسى قۇرىلدى.
اۋىل شارۋاشىلىعى مينيسترلىگىندە قازىرگى ۋاقىتتا تۇقىم شارۋاشىلىعى جۇيەسىن تارتىپكە كەلتىرۋ بويىنشا جۇمىستار جۇرگىزىلۋدە. قازاقستاننىڭ عىلىمي ۇيىمدارى سەلەكسيانىڭ قازىرگى ادىستەرىنە اۋىستىرىلاتىن بولادى. بۇدان باسقا، تۇقىمداردى قاداعالاۋدىڭ سيفرلىق جۇيەسىن ازىرلەۋ باستالدى، دەپ حابارلايدى Almaty-akshamy.kz Eldala.kz سىلتەمە جاساپ.
«ەلگە تۇسكەن كەزدە، ونىڭ ەكسپورتى كەزىندە جانە بۇكىل ەل بويىنشا قوزعالۋ كەزىندە تۇقىمدىق ماتەريالدىڭ ىلگەرىلەۋىنە قاتاڭ باقىلاۋ ورناتۋ تۋرالى ناقتى كوزقاراس بار. ءبىز تۇقىمداردى باقىلاۋدىڭ ساندىق جۇيەسىن جاساۋعا تىكەلەي قاتىسامىز. ءبىزدىڭ ەنشىلەس ۇيىمىمىزدىڭ تالداۋ ورتالىعىنىڭ ماماندارى وسى اقپاراتتىق جۇيەنىڭ مودۋلدەرىن ازىرلەۋگە قاتىسادى. تۇقىم شارۋاشىلىعى بويىنشا باستاپقى دەرەكتەر بازاسى قۇرىلدى. سونداي-اق، ءبىز وسىنداي اقپاراتتىق جۇيەنى ەنگىزگەن رەسەيلىك ارىپتەستەرىمىزدىڭ تاجىريبەسىن بەلسەندى تۇردە زەرتتەيمىز»، - دەدى ۇلتتىق اگرارلىق ءعىلىمي-بىلىم بەرۋ ورتالىعىنىڭ باسقارما ءتورايىمى گۇلميرا يسايەۆا.
سونىمەن قاتار، سەلەكسيالىق عىلىمدى دامىتۋ جونىندەگى 15-20 جىلعا ەسەپتەلگەن ۇزاق مەرزىمدى عىلىمي باعدارلامانى ازىرلەۋ اياقتالدى. عالىمداردىڭ الدىندا قازاقستاننىڭ بارلىق وڭىرلەرىندە سوڭعى جىلدارى بايقالعان كليماتتىڭ وزگەرۋىنە بەيىمدەلگەن داقىلداردىڭ جاڭا سۇرىپتارىن ىرىكتەۋ جانە ءوسىرۋ مىندەتى تۇر.
باعدارلاما عىلىمي-تەحنيكالىق ساراپتامادان ءوتتى جانە قازىرگى ۋاقىتتا اۋىل شارۋاشىلىعى مينيسترلىگى ونى قارجىلاندىرۋ بويىنشا شارالار قابىلداۋدا.
«بۇل ءبىزدىڭ عالىمدارعا جاڭا سۇرىپتاردى قۇرۋ ماسەلەلەرىندە ناقتى قولداۋ كورسەتۋگە مۇمكىندىك بەرەدى دەپ ۇمىتتەنەمىز»، - دەدى گۇلميرا يسايەۆا.