الماتى ورتالىق قالالىق كلينيكالىق اۋرۋحانا دارىگەرلەرى العاش رەت ەكى پاسيەنتتىڭ جۇلىنىنا جاڭا قىمبات نەيروستيمۋلياتورلار ورناتتى.
جالپى قۇنى 8،5 ملن تەڭگەگە جۋىق تۇراتىن جوعارى تەحنولوگيالىق مەديسينالىق قىزمەت ءمامس ەسەبىنەن جاسالدى. ومىرتقاسى اۋىراتىن ناۋقاستاردىڭ دەرتىن جەڭىلدەتەتىن گادجەت جايلى اۋرۋحانا نەيروحيرۋرگيا بولىمشەسىنىڭ مەڭگەرۋشىسى مارات الماتوۆ اڭگىمەلەپ بەردى، دەپ حابارلايدى اlmaty-akshamy.kz.
ماماننىڭ ايتۋىنشا، مۇنداي زاماناۋي نەيروستيمۋلياتورلار قازاقستاندا بۇرىن-سوڭدى قولدانىلماعان. جۇيە Vanta SureScan MRI Medtronic دەپ اتالادى.
«مۇنداي ستيمۋلياتورلار ومىرتقاسى سوزىلمالى تۇردە اۋىراتىن پاسيەنتتەر ءۇشىن تاپتىرماس قۇرىلعى. وتادان كەيىن ولار اۋرۋىن ۇمىتىپ، بىردەن بۇرىنعى قالىپتى ومىرگە ورالادى. Vanta SureScan MRI Medtronic - ەڭ سوڭعى ۇلگىدەگى، جەتىلدىرىلگەن، اقىلدى جۇيە. ءبىز بۇرىن ورناتىپ جۇرگەن قۇرىلعىنىڭ داچيكتەرى ۋاقىت وتە كەلە اۋىرسىنۋدى باسۋ قابىلەتىنەن ايىرىلىپ قالاتىن. ونىڭ ۇستىنە، بۇل ستيمۋلياتور پاسيەنتكە اۆتوماتتى تۇردە رەتتەپ دەنەنى كەز كەلگەن قالىپتا ۇستاۋعا مۇمكىندىك بەرەدى. بۇعان دەيىن ەمدەلۋشىلەر دەنە قالپىن وزگەرتكەندە اۋىرسىنۋدى سەزىنەتىن»، - دەيدى دارىگەر.
جاڭا قۇرىلعىنى ءىس جۇزىندە سىناپ كورۋ باقىتى كوپ جىلدان بەرى ومىرتقانىڭ دەگەنەراتيۆتى اۋرۋىنا شالدىققان ەلىمىزدىڭ ايماعىنان كەلگەن ەكى تۇرعىنعا بۇيىردى.
ەمدەلۋشىنىڭ ەكەۋىندە دە Failed Back Surgery Syndrome - FBSS-پەن بايلانىستى سوزىلمالى نەيروپاتيالىق اۋىرسىنۋ ورىن العان. ولار ءۇشىن قوزعالۋ قيىنعا سوققان. ەكەۋىنە دە ايماقتا بۇعان دەيىن ءتورت رەت ءساتسىز وتا جاسالعان-تىن.
«وتا 2 ساعاتقا سوزىلدى. ءبىز نەيروستيمۋلياتورلاردى شاعىن تىلىك ارقىلى ءدال جۇلىننىڭ ۇستىنە ورناتتىق. پاسيەنت ويانعاننان كەيىن بىردەن جۇيەنى ىسكە قوستىق. ەمدەلۋشىلەرگە ارنايى قوسىمشا ورناتىلعان سمارتفون بەرىلەدى. ول ارقىلى قۇرىلعىنى قاجەت كەزدە رەتتەپ، قوسىپ نەمەسە وشىرۋگە بولادى»، - دەيدى مارات الماتوۆ.
جاڭا جۇيەدە «گيروسكوپ» فۋنكسياسى بار، باعدارلاما سوعان تىگىلگەن جانە ونى سمارتفوننىڭ نە پلانشەتتىڭ كومەگىمەن باسقارۋعا بولادى. وندا ومىرتقانىڭ كەز كەلگەن قالپىن باعدارلاۋعا بولادى. گيروسكوپ بۇل جۇيەدە ومىرتقانىڭ كەز كەلگەن قالپىن اۆتوماتتى تۇردە تانيدى.
«جۇيەنىڭ تاعى ءبىر ارتىقشىلىعى - ستيمۋلياتور ناۋقاستا ءومىرىنىڭ سوڭىنا دەيىن قالادى. پاسيەنت وتادان كەيىن قالىپتى ءومىر سۇرۋگە مۇمكىندىك الادى دەۋگە بولادى. Vanta SureScan MRI Medtronic قازاقستاندا العاش رەت ءبىزدىڭ اۋرۋحانادا ورناتىلعانىن اتاپ وتكىم كەلەدى. ستيمۋلياتوردىڭ ءوزى قىمبات. ءبىر جاقسىسى ءبىزدىڭ ەلدە ونىڭ اقىسى ءمامس ارقىلى تولەنەدى»، - دەيدى نەيروحيرۋرگ.
دارىگەردىڭ ايتۋىنشا، اقىلدى قۇرىلعىنى ورناتۋدى ول الەمنىڭ مىقتى نەيروحيرۋرگتەرىنىڭ ءبىرى ۆلاديمير الەكسەيەۆەستىڭ شەبەرلىك كلاسى اياسىندا ۇيرەنگەن. بۇگىندە ول مينسك قالاسىنداعى «بەلورۋس ۇلتتىق نەيروحيرۋرگيا ورتالىعىنىڭ» عىلىمي اعا مامانى.