اتالعان قوسىمشا جاقىندا قولجەتىمدى بولادى
ءقاۋىپسىز اۋەسقوي تۋريزم. قازاقستاندىقتار مەن ەل قوناقتارى ەندى وزدەرىنىڭ تۋر مارشرۋتىن جاساپ، رەسپۋبليكانىڭ كەز كەلگەن، ءتىپتى ەڭ شالعاي نۇكتەسىنە دە وزدىگىنەن بارا الادى. ولار «TourismKaz» ارنايى ءموبيلدى قوسىمشاسى ارقىلى ۇيلەرىنەن شىقپاي-اق، ساياحاتتاۋعا قاجەتتى تۋريستىك قىزمەتتەر كەشەنىن تاڭداي الادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
جوبا قازۇۋ رەكرەاسيالىق گەوگرافيا جانە تۋريزم كافەدراسىنىڭ مەڭگەرۋشىسى ءاليا اقتىمبايەۆانىڭ جەتەكشىلىگىمەن جۇزەگە استى.
«ءبىزدىڭ نەگىزگى يدەيامىز – ىشكى ءتۋريزمدى دامىتۋ جانە كەڭەيتۋ، قازاقستانعا شەتەلدىك تۋريستەردى كوپتەپ تارتۋ. سونىمەن قاتار تۋريستەرگە ارنالعان تۇرۋ، تاماقتانۋ ورىندارىنىڭ، شالعاي اۋىلدىق ايماقتارداعى ساياحاتشىلىق باعىتتىڭ دامىعانىن قالايمىز. قازاقستانعا كەلەتىن شەتەلدىك قوناقتار كەڭ بايتاق جەرىمىزدىڭ تۇمسا تابيعاتى اۋىلدىق جەرلەردە دە بار ەكەنىن كورسە دەيمىز»، - دەدى جوبا جەتەكشىسى ءاليا اقتىمبايەۆا.
جوبانى ازىرلەۋشىلەر عىلىم قورىنىڭ قولداۋىمەن يدەيانى جۇزەگە اسىرىپ، ونى ناقتى جانە سۇرانىسقا يە ونلاين سەرۆيسكە اينالدىرا الدى.
«عىلىم قورى مەن ق ر ءبىلىم جانە عىلىم مينيسترلىگى 245 ملن تەڭگە ءبولدى. مەملەكەت بۇگىندە ەكونوميكانىڭ بارلىق سالاسىن، اتاپ ايتقاندا وسى ءتۋريزمدى بەلسەندى تۇردە قولدايدى، قارجىلاندىرادى. قازىرگى تاڭدا جوبا اياقتالۋعا جاقىن. تۋريستىك نارىقتى ىشكى تۋريزمگە قايتا باعدارلاۋ باستالدى. سوندىقتان بۇل جوبا ىشكى ءتۋريزمدى دامىتۋعا ىقپال ەتەدى»، - دەيدى «عىلىم قورى» اق جوبالاۋ ديرەكسياسىنىڭ باسقارۋشى ديرەكتورى مارات پەرنەقۇلوۆ.
ازىرلەۋشىلەردىڭ ايتۋىنشا، قوسىمشانى پايدالانۋ وڭاي. قىزمەتتىڭ ىزدەۋ جۇيەسىنە دەرەكتەردى ەنگىزگەننەن كەيىن بىرنەشە سەكۋند ىشىندە ەكراندا قازاقستان بويىنشا جايلى جانە ءتيىمدى ساياحات جاساۋ ءۇشىن تۋريستىك قىزمەتتەردىڭ ۇزدىك ۇسىنىستارى كورسەتىلەدى. سونىمەن قاتار بۇل جەردە پىكىر جازىپ، ونى وقۋعا، ءتىپتى تاڭداعان مەكەننىڭ ورنالاسقان جەرىن دە كورۋگە بولادى. سونداي-اق برون جاساپ، ەڭ ءتيىمدى باعادا دەلدالسىز تۋريستىك مارشرۋت ساتىپ الۋعا مۇمكىندىك بار.