قازاقستاندا ەسكى بانكنوتتار جاڭا ۇلگىدەگى كۋپيۋرالارعا اۋىستىرىلىپ جاتىر. قازاقستان ۇلتتىق بانكى 1000، 2000، 5000 جانە 10 000 تەڭگەلىك ەسكى بانكنوتتاردىڭ پاراللەل اينالىمنان شىعاتىن مەرزىمدەرىن جاريالادى، - دەپ حابارلايدى Aqshamnews.kz ءتىلشىسى.
ۇلتتىق بانكتە بۇگىنگى تاڭدا اينالىمدا 1000، 2000 جانە 10 000 تەڭگەلىك جاڭا ۇلگىدەگى بانكنوتتار بار ەكەنىن ەسكە سالدى. ەسكى كۋپيۋرالار ءۇشىن پاراللەل اينالىمدى توقتاتۋ مەرزىمدەرى:
-
2000 تەڭگەلىك بانكنوتتار — 2026 جىلعى 24 ماۋسىمعا دەيىن؛
-
10 000 تەڭگەلىك بانكنوتتار — 2026 جىلعى 27 ماۋسىمعا دەيىن؛
-
1000 تەڭگەلىك بانكنوتتار — 2027 جىلعى 27 ناۋرىزعا دەيىن.
بۇعان قوسا، ۇلتتىق بانك 2025 جىلعى 24 قىركۇيەكتەن باستاپ 2011 جىلعى ۇلگىدەگى 5000 تەڭگەلىك بانكنوتتاردىڭ پاراللەل اينالىمى توقتاتىلاتىنىن ەسكە سالدى.
"پاراللەل اينالىم كەزەڭى اياقتالعاننان كەيىن، ياعني 2025 جىلعى 25 قىركۇيەكتەن باستاپ بارلىق بانكتەر مەن "قازپوشتا" ەسكى ۇلگىدەگى بانكنوتتاردى جاڭا ۇلگىدەگىلەرىنە 3 جىل بويى ايىرباستايدى، ال ۇلتتىق بانكتىڭ فيليالدارى ولاردى مەرزىمسىز قابىلدايدى"، - دەپ ناقتىلادى ۇلتتىق بانك.