پرەزيدەنت كەڭەسشىسى قانات بوزىمبايەۆ «Global Water» اتتى سۋ ۇنەمدەۋ تەحنولوگيالارىنا ارنالعان ءبىرىنشى حالىقارالىق فورۋمدا ەلىمىزدە سۋ سالاسىنا عانا ماماندانعان جوو قۇرىلۋى مۇمكىن ەكەنىن ءمالىم ەتتى، دەپ حابارلايدى Almaty-akshamy.kz.
«جالپى سۋدى كوپ شىعىندايتىن داقىلداردىڭ القابىن ازايتىپ، ولاردى سۋدى بارىنشا از شىعىندايتىن داقىلدارمەن اۋىستىرۋ كەرەك. سۋمەن جابدىقتاۋ سالاسىندا سۋدى قاتالاپ پايدالانۋ، قالدىق سۋدى وڭدەپ تۇتىنۋ تاسىلدەرىن بەلسەندى پايدالانۋدان ۇلكەن الەۋەت كورىپ وتىرمىز. كەز كەلگەن ءىرى سۋ تۇتىنۋشى كاسىپورىندا ءوزىنىڭ سۋ تۇتىنۋ كولەمىن 25-30% ازايتۋعا باعىتتالعان ءىس شارالارىن جوسپارى بولۋ كەرەك. مۇنداي جۇمىس تا وسى كەزدەن باستالۋ كەرەك»، - دەدى قانات بوزىمبايەۆ.
سونداي-اق، ەلدەگى سۋدىڭ كوبى بۋلانۋ ارقىلى دا ءراسۋا بولىپ جاتقانىن اتاپ ءوتتى.
«بۇل ماسەلەدە حالىقارالىق تاجريبەنى ەسكەرۋ وتە ماڭىزدى. وكىنىشكە قاراي، بىزدەگى سۋ سالاسىن عىلىمي زەرتتەۋ جاعى شەتەلمەن سالىستىرعاندا ءبىرتالاي ارتتا قالعان. ءقازىر بىزگە بۇل سالادا ساپالى ماماندار بۇرىن بولماعان دەڭگەيدە قاجەت. ەلىمىزدەگى بازالىق جوعارى وقۋ ورىندارىنىڭ ءبىرىن تازا سۋ تاقىرىبىنا ماماندانعان ۋنيۆەرسيتەت ەتىپ قالپىنا كەلتىرۋ ماسەلەسى قارالىپ جاتىر»، - دەدى پرەزيدەنت كەڭەسشىسى.