قازاقستاندا تاكسي قىزمەتىنىڭ باعاسى ەكى ەسەگە دەيىن قىمباتتاۋى مۇمكىن

جاڭا سالىق ەرەجەسى ەنگىزىلگەن جاعدايدا، بۇل سالانىڭ بولاشاعى كۇمان تۋدىرادى دەپ ساراپشىلار دابىل قاعۋدا.

قازىرگى تاڭدا كاسىپكەرلەر 4 پايىزدىق سالىق تولەپ كەلسە، جاڭا تالاپ بويىنشا بۇل كورسەتكىش 16 پايىزعا دەيىن ءوسۋى ىقتيمال، دەپ حابارلايدى aqshamnews.kz.

 مۇنداي جۇكتەمەگە توتەپ بەرۋ مۇمكىن ەمەس ەكەنىن ايتقان تاسىمالداۋ سالاسىنىڭ وكىلدەرى، ەلىمىزدەگى 300-گە جۋىق تاكسوپارك جابىلۋ قاۋپىندە تۇرعانىن العا تارتادى.

مىسالى، كولىكتى ءبىر كۇنگە جالعا الۋ قۇنى ءقازىر 12 مىڭ تەڭگە بولسا، سالىقتىڭ ارتۋىنا بايلانىستى بۇل باعا 22 مىڭ تەڭگەگە دەيىن كوتەرىلۋى مۇمكىن. ءوز كەزەگىندە، تاكسي جۇرگىزۋشىلەرى بۇل شىعىندى وتەۋ ءۇشىن تاسىمال قۇنىن ارتتىرۋعا ءماجبۇر بولادى، ناتيجەسىندە كولەڭكەلى بيزنەسكە بەت بۇرۋشىلار سانى ءوسۋى ىقتيمال.

باعانىڭ شارىقتاۋى، ەڭ الدىمەن، قاراپايىم حالىققا اۋىر تيەدى. قازىرگى تاڭدا قازاقستاندا 100 مىڭنان استام ازامات تاكسي جانە كۋرەرلىك قىزمەتتە جۇمىس ىستەيدى. ەگەر بۇل سالاداعى سالىقتىق وزگەرىستەر ىسكە اسسا، كوپتەگەن جۇرگىزۋشىلەر مەن تاسىمالداۋ كومپانيالارى جۇمىسىن توقتاتۋى مۇمكىن، ال بۇل ەل ەكونوميكاسىنا دا، تۇرعىنداردىڭ كۇندەلىكتى ومىرىنە دە ەلەۋلى اسەر ەتپەك.