قازاقستاندا تاعى ءبىر جاڭا قانت زاۋىتى سالىنادى

زاۋىت اقتوبە وبلىسىندا سالىنادى.

6 جەلتوقساندا استانادا وتكەن «Investment Aktobe-2022» VII حالىقارالىق ينۆەستيسيالىق فورۋمى اياسىندا اقتوبە وبلىسىنىڭ اكىمى ەرالى توعجانوۆ پەن Omtis Ortadoğu Makina كومپانياسىنىڭ قۇرىلتايشىسى يبراگيم گۇلتەكين قانت زاۋىتىنىڭ قۇرىلىسى جوباسىن جۇزەگە اسىرۋ تۋرالى مەموراندۋمعا قول قويدى، دەپ حابارلايدى Almaty-akshamy.kz Baq.kz سىلتەمە جاساپ.

مەملەكەت باسشىسىنىڭ ازىق-تۇلىك قاۋىپسىزدىگىن قامتاماسىز ەتۋ جانە نارىقتى وتاندىق ونىممەن تولىقتىرۋ جونىندەگى تاپسىرماسى اياسىندا باتىس قازاقستاندا قانت قىزىلشاسىنان تۇيىرشىكتەلگەن اق قانت ءوندىرۋ بويىنشا ءىرى جوبا جۇزەگە اسىرىلماق.

قانت زاۋىتىنىڭ قۇرىلىسى - قازاقستان ءۇشىن باسىم باعىتتاردىڭ ءبىرى، ويتكەنى، ەلىمىزدىڭ، اتاپ ايتقاندا، اقتوبە وبلىسىنىڭ نارىعى يمپورتقا تاۋەلدى.

كۇردەلى ينجەنەرلىك جوبالاردى سالۋدا ۇلكەن تاجىريبەسى بار Omtis Ortadoğu Makina 550 ميلليون اقش دوللارىن ينۆەستيسيالاۋعا دايىن. زاۋىتتىڭ قۋاتتىلىعى جىلىنا 330 مىڭ توننانى قۇرايدى. 180 جۇمىس ورنى اشىلادى. ايتا كەتەيىك، فورۋمعا 30-دان استام ەلدىڭ ديپلوماتيالىق ميسسيالارى، ۇكىمەت مۇشەلەرى، ۇلتتىق حولدينگتەر مەن كومپانيالاردىڭ، قارجى ينستيتۋتتارىنىڭ، ترانسۇلتتىق كورپوراسيالاردىڭ باسشىلارى، شەتەلدىك جانە وتاندىق ءىرى بيزنەس وكىلدەرى، عالىمدار مەن ساراپشىلار قاتىستى.

حالىقارالىق شارا ءوڭىردىڭ ينۆەستيسيالىق الەۋەتىن تانىستىرۋ، قولايلى ينۆەستيسيالىق ءيميدجىن ىلگەرىلەتۋ، سونداي-اق اقتوبە وبلىسىنىڭ ەكونوميكاسىنا ىشكى جانە شەتەلدىك ينۆەستيسيالاردىڭ اعىنىن ودان ءارى تارتۋ ماقساتىندا ۇيىمداستىرىلدى.