الماتى قالاسى بويىنشا 8 مەكتەپتە جوندەۋ جۇمىستارى اياقتالماعان.
بۇل تۋرالى ق ر وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى ەرنۇر داۋەنوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيىل رەسپۋبليكا بويىنشا 276 مەملەكەتتىك مەكتەپ كۇردەلى جوندەۋ جۇرگىزۋ جۇمىستارىمەن قامتىلعان. قازىرگە دەيىن 205 مەكتەپتى، ياعني 74 پايىزىن جوندەۋ اياقتالدى. ال 71 مەكتەپتە جۇمىستار جالعاسىپ جاتىر. كۇردەلى جوندەۋ جۇمىستارى تۇركىستان وبلىسىندا 20 مەكتەپتە، باتىس قازاقستاندا - 9، الماتى وبلىسىندا 7 مەكتەپتە اياقتالماعان. الماتى قالاسىندا 8 مەكتەپ بىتپەگەن، ونىڭ وبەكتيۆتى سەبەپتەرى بار. بۇل نىسانداردا سەيسموگەولوگيا تالاپتارىنا قاتىستى جۇمىستار اتقارىلىپ جاتىر»، - دەدى ە. داۋەنوۆ مينيسترلىكتىڭ اپپارات كەڭەسىندە.
ونىڭ ايتۋىنشا، 13 مەكتەپتە ءجۇرىپ جاتقان كۇردەلى جوندەۋ جۇمىستارىنىڭ كەلىسىمشارت بويىنشا مەرزىمدەرى وتكەن، ياعني مەردىگەرلەر وزدەرىنىڭ جوسپارىن ورىنداي الماي جاتىر. وسى ورايدا الماتى، اتىراۋ، جەتىسۋ وبلىستارىندا 2 مەكتەپتەن، استانا قالاسى، قىزىلوردا، جامبىل، پاۆلودار جانە سولتۇستىك قازاقستان وبلىستارىندا 1 مەكتەپتەن تيەسىلى.
«اتالعان وڭىرلەر جوندەۋ جۇمىستارىنىڭ ۋاقىتىلى اياقتالماۋىنا بايلانىستى ءبىلىم بولىمدەرى مەن ءبىلىم باسقارمالارى زاڭناماعا سايكەس ءتيىستى شارالاردى قابىلداۋى قاجەت. رەسپۋبليكا بويىنشا 26 مەكتەپتە جوندەۋ جۇمىستارى بيىل اياقتالماي، 2023 جىلعا ءوتۋى مۇمكىن. بۇل تۇرعىدا تۇركىستان وبلىسىندا 13 مەكتەپ، باتىس قازاقستان، قوستاناي، اباي وبلىستارىندا 2 مەكتەپتەن بار. جوندەۋ جۇمىستارىنىڭ ۋاقىتىلى اياقتالماۋى وقۋ پروسەسىنە كەدەرگى جاساپ وتىر»، - دەدى كوميتەت باسشىسى.
ونىڭ سوزىنە قاراعاندا، ءقازىر جوندەۋ جۇمىستارى ءجۇرىپ جاتقان 16 مەكتەپتىڭ 5 265 وقۋشىسى 1 قىركۇيەكتەن باستاپ جاقىن ورنالاسقان مەكتەپتەر مەن باسقا دا بەيىمدەلگەن عيماراتتاردا ءبىلىم الىپ جاتىر. وزگە عيماراتتاردا ءبىلىم الىپ جاتقان وقۋشىلاردىڭ ەڭ كوپ سانى باتىس قازاقستان (2131 وقۋشى) جانە جامبىل (1985 وقۋشى) وبلىستارىندا.
سونىمەن قاتار تۇركىستان وبلىسى ورداباسى اۋدانىنداعى ىسمايلوۆ اتىنداعى مەكتەپتىڭ 500 وقۋشىسى بۇرىنعى وقۋشىلار سارايىنىڭ عيماراتىندا وقىپ جاتىر.