«رەسپۋبليكا» پارتياسى تىركەلدى.
قازاقستاندا تاعى ءبىر ساياسي پارتيا تىركەلدى. بۇل تۋرالى ق ر ادىلەت ءمينيسترى قانات مۋسين ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى تاڭدا «بايتاق»، سودان كەيىن «رەسپۋبليكا» پارتياسى تىركەلدى. ياعني، رەسمي تۇردە ەكى پارتيا تىركەلىپ وتىر. باسقا پارتيالارمەن جۇمىس ىستەلىپ جاتىر. ولار ءبىرىنشى ساتىدان ءالى وتكەن جوق. سەبەپتەرى بۇرىنعىداي. تاپسىرعان قۇجاتتارى زاڭعا سايكەس كەلمەيدى. ولار تولىققاندى تىركەلگەن، بارلىق ساياسي پارتيالار سياقتى تولىققاندى قۇقىقتارى بار پارتيالار سانالادى»، - دەدى قانات مۋسين پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرىنىڭ ساۋالىنا وراي.
ونىڭ ايتۋىنشا، اتالعان ەكى پارتيانىڭ قۇجاتتارى تەكسەرۋ بارىسىندا بىرنەشە رەت كەرى قايتارىلعان.
«ولار قايتارىلعان قۇجاتتارداعى كەمشىلىكتەردى جويىپ، تىركەۋدەن ءوتىپ وتىر»، - دەدى مينيستر.