ەلىمىزدىڭ بارلىق ايماعىندا سۋارۋ ماۋسىمى اياقتالدى.
ۆەگەتاسيا كەزەڭى 1 ساۋىردە باستالدى. قۇرعاقشىلىق تۋرالى ءتۇرلى بولجامدارعا قاراماستان، ۇكىمەت قاجەتتى ءىس-شارالاردى قابىلداپ، شارۋالاردى سۋارمالى سۋمەن ۇزدىكسىز قامتاماسىز ەتتى، دەپ حابارلايدى aqshamnews.kz.
سۋارۋ كەزەڭىندە سۋ رەسۋرستارى جانە يرريگاسيا مينيسترلىگى شارۋالارعا 11،2 ملرد تەكشە مەترگە جۋىق سۋ بەردى.
بيىل مينيسترلىككە ۆەدومستۆولىق باعىنىستى «قازسۋشار» مەكەمەسىنىڭ فيليالدارى شارۋا قوجالىقتارىمەن سۋارمالى سۋ بەرۋ جونىندە 25 مىڭعا جۋىق كەلىسىمشارت جاسادى.
سۋ تۇتىنۋ كولەمى بويىنشا كوش باسىندا - قىزىلوردا وبلىسى. ءوڭىردىڭ ديحاندارىنا 3،7 ملرد تەكشە مەتر سۋ بەرىلدى. تۇركىستان وبلىسىنىڭ شارۋالارى 3،4 ملرد تەكشە مەتر سۋ الدى. جەتىسۋ وبلىسىنىڭ ديحاندارىنا 1،37 ملرد تەكشە مەتر سۋ بەرىلسە، الماتى وبلىسىنىڭ شارۋالارى 1،57 ملرد تەكشە مەتر سۋ پايدالاندى.
«ۇكىمەت توتەنشە جاعداي مەن سۋارمالى سۋ تاپشىلىعىنىڭ الدىن الدى. ءبىز بىلتىرعى جاعدايدان تاجىريبە جيناپ، ساباق الدىق. وسىنىڭ ناتيجەسىندە بيىل شارۋالاردى ۇزدىكسىز سۋارمالى سۋمەن قامتاماسىز ەتتىك. سۋ ديپلوماتياسى دا ماڭىزدى ءرول اتقارعانىن ايتا كەتكەن ءجون. بيىل وزبەكستان، قىرعىزستان جانە تاجىكستان ەلىمىزگە باستاپقىدا بولجانعان كولەمنەن ارتىق سۋ جىبەردى»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
بۇگىنگى تاڭدا سۋ رەسۋرستارى جانە يرريگاسيا مينيسترلىگى سۋ تاسقىنى كەزەڭىنە دايىندىقتى باستادى. ەلىمىزدىڭ سولتۇستىك، باتىس، شىعىس جانە ورتالىق ايماقتارىنداعى سۋ قويمالارىنان سۋ جىبەرىلە باستادى. ال، وڭتۇستىك وبلىستارداعى سۋ قويمالارى كەرىسىنشە، سۋ جيناۋ رەجيمىندە جۇمىس ىستەپ جاتىر.
ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ كەلەسى وتىرىسىندا نارىن-سىرداريا سۋ قويمالارى كاسكادىنىڭ بولجامدى جۇمىس كەستەسى جاسالادى جانە كەلەسى جىلعا سۋ بەرۋ كولەمى بەكىتىلەدى.