قار مەن مۇزدان تازارتۋ جۇمىستارى باستالدى.
يندۋستريا مينيسترلىگى سۋ تاسقىنى كەزەڭىنە دايىندىقتى باقىلاۋدى كۇشەيتتى. بۇل تۋرالى ق ر ۇكىمەتىنىڭ وتىرىسىندا ۆەدومستۆو باسشىسى قايىربەك وسكەنبايەۆ مالىمدەدى، دەپ حابارلايدى Almaty-akshamy.kz.
«مينيستر اۆتوموبيل جولدارىن سۋ تاسقىنى كەزەڭىنە دايىنداۋ اياسىندا ارنايى ءىس-شارالار جوسپارى بەكىتىلگەنىن ايتتى»، - دەلىنگەن يندۋستريا مينيسترلىگىنىڭ باسپا ءسوز قىزمەتىنىڭ حابارلاماسىندا.
وعان سۋ تاسقىنى ءقاۋپى بار ۋچاسكەلەردى كۇندەلىكتى تەكسەرۋ، ءجۇرۋ بولىگىن، جول جيەكتەرىن، سۋ وتكىزۋ قۇبىرلارىنىڭ تەسىكتەرى مەن ارنالارىن قار مەن مۇزدان تازارتۋ، سۋ تاسقىنىنا قارسى جانە اۆاريالىق جۇمىستاردى جۇرگىزۋ ءۇشىن جول جانە ينەرتتى ماتەريالداردى دايىنداۋ جۇمىستارى كىرەدى.
«جولدارعا تاۋلىك بويى كەزەكشىلىك ەتۋ جانە پاترۋلدەۋ ۇيىمداستىرىلدى، سۋ وتكىزۋ قۇبىرلارى مەن كوپىر استى ايماقتارىنىڭ ارنالارىن قار مەن مۇزدان تازارتۋ باستالدى. 278 ءقاۋىپتى ۋچاسكە، 84 كوپىر جانە 883 سۋ وتكىزۋ قۇبىرى ەرەكشە باقىلاۋدا. ولارعا 700-دەن استام جول-پايدالانۋ تەحنيكاسى بەكىتىلگەن. سۋ تاسقىنىنا قارسى شارالاردى ورىنداۋ كەزىندە وڭىرلەردىڭ كليماتتىق جاعدايلارى، سونداي-اق وتكەن جىلدارداعى سۋ تاسقىنى كەزەڭىنىڭ ناتيجەلەرى ەسكەرىلەدى»، - دەپ باياندادى قايىربەك وسكەنبايەۆ.
سۋ تاسقىنى ءقاۋپىن جويۋ ءۇشىن، ءمينيستردىڭ مالىمەتىنشە، قازىرگى ۋاقىتتا ماتەريالداردىڭ 80%-ى، ونىڭ ىشىندە 4 مىڭ تەكشە مەتر قۇم، 7 مىڭ تەكشە مەتر تاس، 20 مىڭ تەكشە مەتر قيىرشىق تاس، 50 مىڭ قاپ جانە 434 توننا ججم دايىندالدى.
ۆەدومستۆو باسشىسى سۋ تاسقىنى ءقاۋپى بار ۋچاسكەلەردەگى اۆتوجولداردى قايتا قۇرۋ جانە جوندەۋ بارىسىندا جۇمىسشىلار سۋ وتكىزەتىن قۇبىرلاردىڭ كوپ مولشەرىن ورناتاتىنىن نەمەسە ولاردىڭ ديامەترىن ارتتىراتىنىن اتاپ ءوتتى.