قازاقستاندا سيم-بوكستارعا تىيىم سالىنۋى مۇمكىن

قازاقستاندا سيم-بوكستاردى باقىلاۋعا الۋ جانە بيومەتريالىق ۆەريفيكاسيانى ەنگىزۋ ۇسىنىلۋدا.

بۇل باستامانى سەنات دەپۋتاتى جاننا اسانوۆا كوتەرىپ وتىر.
بۇل تۋرالى Aqshamnews.kz سايتى حابارلايدى.

سيم-بوكستار – ءبىر ۋاقىتتا جۇزدەگەن SIM-كارتانى قولدانۋعا مۇمكىندىك بەرەتىن قۇرىلعىلار. مۇنداي تەحنولوگيانى الاياقتار كەڭىنەن پايدالانادى. سەناتوردىڭ ايتۋىنشا، قازىرگى زاڭناما SIP-تەلەفونيامەن كەز كەلگەن ادامنىڭ اينالىسۋىنا رۇقسات بەرەدى، ال سيم-بوكستار ەلگە ەش كەدەرگىسىز كىرگىزىلەدى. بۇل ازاماتتاردىڭ قاۋىپسىزدىگىنە ەلەۋلى ءقاۋىپ توندىرەدى.

«قىلمىسكەرلەر SIP-تەلەفونيا مەن سيم-بوكستاردى كەڭىنەن قولدانۋدا. سوندىقتان ءبىز بۇل سالانى قاتاڭ باقىلاۋعا الۋىمىز كەرەك. ونىڭ ىشىندە SIP-تەلەفونيانى ليسەنزيالاۋدى ەنگىزۋ – ماسەلەنى شەشۋدىڭ ءبىر جولى. بۇل جۇيەنى باقىلاۋعا مۇمكىندىك بەرەدى»، – دەدى جاننا اسانوۆا.

سەناتور، سونداي-اق، سيم-بوكستاردى زاڭسىز پايدالانۋ جانە SIP-تەلەفونيانى قىلمىستىق ماقساتتا قولدانۋ ءۇشىن جازانى كۇشەيتۋدى ۇسىندى. بۇل شارالار تەلەفون ارقىلى جاسالاتىن الاياقتىقپەن كۇرەستى كۇشەيتۋگە باعىتتالعان.