الماتى قالاسىندا كاسىبي ءبىلىم بەرۋ سالاسىندا «تمد ەلدەرىنىڭ كاسىبي ءبىلىم بەرۋ پەداگوگتارى» حالىقارالىق پەداگوگيكالىق شەبەرلىك بايقاۋى ءوتتى.
بايقاۋدى ۇيىمداستىرۋشىلار رەتىندە الماتى قالاسىنىڭ ءبىلىم باسقارماسى جانە الماتى تەحنولوگيالىق كوللەدجى، الەۋمەتتىك سەرىكتەستەر مەن باسقا دا كوللەدجدەردىڭ قولداۋىمەن شىقتى.
بايقاۋ پەداگوگتاردىڭ كاسىبي قۇزىرەتتىلىگىن دامىتۋعا، ولاردى ۇزدىكسىز ءبىلىم الۋعا جانە ءوزىن-وزى جەتىلدىرۋگە ىنتالاندىرۋعا باعىتتالعان. ءىس-شارانىڭ نەگىزگى ماقساتى — ورتالىق ازيا جانە تمد ەلدەرى اراسىندا تالانتتى پەداگوگتاردى انىقتاۋ جانە قولداۋ، الدىڭعى قاتارلى پەداگوگيكالىق تاجىريبەنى جيناقتاۋ. بايقاۋ، سونىمەن قاتار، پەداگوگتاردى دايىندىق، وتكىزۋ جانە بايقاۋ تاپسىرمالارىن باعالاۋ پروسەسىندە بىرلەسىپ جۇمىس ىستەۋ ارقىلى الەمدىك ءبىلىم بەرۋ كەڭىستىگىنە ينتەگراسيالاۋعا ىقپال ەتۋگە ءتيىس.بايقاۋعا الماتى قالاسىنىڭ كوللەدجدەرى مەن كاسىبي ليسەيلەرىنىڭ پەداگوگتارى (وندىرىستىك وقىتۋ شەبەرلەرى جانە ارنايى پاندەردىڭ وقىتۋشىلارى)، رەسەي فەدەراسياسى، قىرعىز رەسپۋبليكاسى، وزبەكستان رەسپۋبليكاسى قاتىستى، ولار ءتيىستى سالالاردا جۇمىس تاجىريبەسىنە يە بولدى. ءاربىر ءبىلىم بەرۋ ۇيىمى ءبىر سالا بويىنشا ءبىر قاتىسۋشىنى ۇسىندى. ەگەر بۇل جىلعى بايقاۋ ءساتتى وتسە، ۇيىمداستىرۋشىلار كەلەسى جىلدارى سالالار ءتىزىمىن كەڭەيتىپ، ءىس-شارانى وفلاين فورماتتا وتكىزۋدى جوسپارلاپ وتىر.
بايقاۋ تاپسىرمالارى ەكى بولىمگە ءبولىندى: تەوريالىق جانە پراكتيكالىق. تەوريالىق بولىمگە پەداگوگيكالىق تاجىريبەگە بايلانىستى سيتۋاسيالىق ەسەپتەردى شەشۋ كىردى. پراكتيكالىق ءبولىم كەلەسى سالالار بويىنشا كاسىبي مودۋلدەردى ورىنداۋدى قاراستىردى. «كونديتەر» باعىتىنداعى قاتىسۋشىلار ەكى قاباتتى مەرەكەلىك تورت دايىنداپ، ماستيكامەن جۇمىس ىستەۋ داعدىلارىن، كونديتەرلىك قۇرالداردى پايدالانۋدى جانە قاۋىپسىزدىك تەحنيكاسىن ساقتاۋدى كورسەتۋى كەرەك بولدى.
«اسپاز» سالاسىندا قاتىسۋشىلارعا قۇس ەتى مەن سيىر ەتىنەن ىستىق تاعام دايىنداۋ، گارنير مەن تۇزدىق قوسىپ، زاماناۋي دايىنداۋ ادىستەرىن قولدانۋ تاپسىرىلدى.
«گورنيچنايا/Housekeeper» باعىتىندا قاتىسۋشىلار ءقوناقۇي ءنومىرىن تازالاپ، «Honeymoon» ستيلىندە بەزەندىرۋى، گورنيچنايا ارباسىمەن جۇمىس ىستەۋ داعدىلارىن جانە ەكولوگيالىق تازالاۋ ادىستەرىن ءبىلۋىن كورسەتۋى كەرەك بولدى.
«داياشى» سالاسىندا بايقاۋشىلار ۇستەل سەرۆيزىن جيناپ، مايلىقتاردى ءارتۇرلى ادىستەرمەن بۇكتەۋى جانە شاراپتى دەكانتيرلەۋ داعدىلارىن كورسەتۋى كەرەك بولدى.
«بارمەن-باريستا» باعىتىندا قاتىسۋشىلار كوفە ىشىمدىكتەرىن (لاتتە-ارت جانە لاتتە-ماكناتو) دايىنداپ، اۆتورلىق الكوگولسىز كوكتەيل جاساۋى، گيگيەنا جانە قاۋىپسىزدىك ستاندارتتارىن ساقتاۋى كەرەك بولدى.
بايقاۋ الماتى تەحنولوگيالىق كوللەدجىنىڭ، الماتى قىزمەت كورسەتۋ جانە تەحنولوگيا كوللەدجىنىڭ، سونداي-اق رەسەي فەدەراسياسى مەن قىرعىز رەسپۋبليكاسى كوللەدجدەرىنىڭ بازاسىندا ارالاس فورماتتا (ونلاين/وفلاين) ءوتتى.
قاتىسۋشىلاردىڭ جۇمىستارى بەلگىلەنگەن كريتەرييلەر بويىنشا تاجىريبەلى پەداگوگتار مەن مامانداردان تۇراتىن بايقاۋ قۇرىلتايىنىڭ القاسىمەن باعالاندى. ءاربىر سالا بويىنشا بايقاۋ جەڭىمپازدارى I، II جانە III دارەجەلى ديپلومدارمەن ماراپاتتالدى.
«تمد ەلدەرىنىڭ كاسىبي ءبىلىم بەرۋ پەداگوگتارى» حالىقارالىق بايقاۋى قاتىسۋشى ەلدەردىڭ پەداگوگتارى ءۇشىن ماڭىزدى ءىس-شارا بولىپ تابىلادى، ول ولارعا كاسىبي داعدىلارىن كورسەتۋ، تاجىريبە الماسۋ جانە كاسىبي دامۋعا شابىت الۋ مۇمكىندىگىن بەرەدى. ۇيىمداستىرۋشىلار بايقاۋدىڭ ءداستۇرلى بولىپ، ورتالىق ازيا مەن تمد ەلدەرىندە كاسىبي ءبىلىم بەرۋ ساپاسىن ارتتىرۋعا ىقپال ەتەتىنىنە ۇمىتتەنەدى.