قازاقستاندا شاشتاراز جانە سۇلۋلىق سالوندارىنىڭ قىزمەتتەرى قىمباتتادى

قازاقستانداعى شاشتاراز جانە سۇلۋلىق سالوندارىنىڭ قىزمەتتەرى 2023 جىلدىڭ قاراشا ايىمەن سالىستىرعاندا ايتارلىقتاي قىمباتتادى. قىزمەتتەر قۇنى اي سايىن 1،4%-عا، ال جىلدىق دەڭگەيدە 12،6%-عا ارتقان، دەپ حابارلايدى aqshamnews.kz.

ءار ايماقتا باعالاردىڭ ءوسۋى ءارتۇرلى دەڭگەيدە بايقالدى. ەڭ كوپ قىمباتتاۋ اباي وبلىسىندا تىركەلدى، مۇندا باعا ءبىر جىلدا 26،2%-عا وسكەن. ودان كەيىنگى ورىنداردى ۇلىتاۋ وبلىسى (23،8%) جانە سولتۇستىك قازاقستان وبلىسى (20،1%) الدى.

ال استانادا باعا تەك 3،8%-عا عانا وسكەن. اقتوبە جانە الماتى وبلىستارىندا دا باعانىڭ كوتەرىلۋى سالىستىرمالى تۇردە تومەن بولىپ، تيىسىنشە 5% جانە 5،5%-دى قۇرادى.

شاشتاراز جانە سۇلۋلىق قىزمەتتەرى اراسىندا ناقتى قانداي قىزمەتتەردىڭ باعاسى وسكەنى جايلى اقپارات تا ماڭىزدى. مىسالى، ايەلدەرگە ارنالعان شاشتاراز قىزمەتى ءبىر جىلدا 15،8%-عا قىمباتتاسا، ەرلەرگە ارنالعان شاشتاراز قىزمەتى 11،8%-عا وسكەن. سونىمەن قاتار، تىرناقتى ارىلەۋ قىزمەتى 14،5%-عا، پەديكيۋر 8،8%-عا، ال ەپيلياسيا قىزمەتى 8،2%-عا قىمباتتاعان.

قازاقستاننىڭ ءىرى قالالارى اراسىندا ايەلدەر مەن ەرلەردىڭ شاشتاراز قىزمەتتەرى ەڭ قىمبات الماتىدا تىركەلدى. الماتىدا ايەلدەرگە ارنالعان شاشتاراز قىزمەتىنىڭ قۇنى ورتاشا ەسەپپەن 6،1 مىڭ تەڭگە بولسا، ەرلەرگە ارنالعان شاشتاراز قىزمەتى 3،6 مىڭ تەڭگەگە باعالانادى.

ال ەڭ ارزان شاشتاراز قىزمەتى سەمەي مەن ورال قالالارىندا بايقالدى. سەمەيدە ايەلدەرگە ارنالعان شاشتاراز 2،5 مىڭ تەڭگەگە، ال ورالدا ەرلەرگە ارنالعان شاشتاراز 1،8 مىڭ تەڭگەگە ۇسىنىلادى.