دەنساۋلىق ساقتاۋ مينيسترىلىگىنىڭ باسشىلىعى سەنبى كۇنگى كارانتين ءتارتىبىن جەڭىلدەتۋگە قاتىستى تۇسىنىك بەردى، دەپ حابارلايدى قازاقپارات ءتىلشىسى.
ورتالىق كوممۋنيكاسيالار قىزمەتىندە «اتامەكەن» ۇكپ-نىڭ كارانتيندىك ءىس-شارالاردى جەڭىلدەتۋگە قاتىستى ۇسىنىسى بويىنشا سۇراق قويىلدى.
ق ر دسم سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا بۇل ماسەلە تۇرعىسىندا الداعى ءبىر اپتادا ەلدەگى ەپيدەميولوگيالىق جاعداي نازارعا الىناتىنىن اتاپ ءوتتى.
«ەگەر تۇراقتانۋ جاعدايى جالعاساتىن بولسا، وندا كەلەسى سەنبىدەن بۇل شارالار قابىلدانۋى مۇمكىن»، - دەدى كوميتەت باسشىسى.
ءوز كەزەگىندە دەنساۋلىق ساقتاۋ ءمينيسترى الەكسەي سوي دەمالىس كۇندەرىندەگى لوكداۋنعا قاتىستى پىكىر ءبىلدىردى.
«بۇل ماسەلەگە قاتىستى «اتامەكەن» پالاتاسى بىزبەن بىرگە تالقىلادى. ەگەر بىزدە جاعداي تۇراقتاسا، الداعى اپتادان سەنبى كۇنىنە قاتىستى جەڭىلدەتۋدى قاراستىرىپ وتىرمىز. اتاپ ايتقاندا، الماتى بويىنشا احۋال كۇردەلى، ءولىم-جىتىم مەن ىندەت جۇقتىرۋ دەڭگەيى جوعارى. سوندىقتان قازىرگى كەزدەگى شەكتەۋ ءىس-شارالارى ونداعى جاعدايعا سايكەس كەلىپ تۇر. بۇل تۇرعىدا ادامداردىڭ ءومىرى ماڭىزدى. وسى جاعدايعا ەرەكشە ءمان بەرىپ وتىرمىز. ەگەر مۇمكىن بولسا، وندا جەڭىلدەتۋ قادامدارىن جاساپ، بيزنەس ءۇشىن مۇمكىندىكتەردى اشامىز»، - دەدى ا. سوي.