باس پروكۋراتۋرا ازاماتتاردى زاڭنامانى مۇلتىكسىز ساقتاۋعا، ارانداتۋشىلىققا بوي الدىرماۋعا، جالعان حابارلامالارعا دەن قويماۋعا جانە رەسمي اقپارات كوزدەرىنە عانا سەنۋگە شاقىردى، دەپ حابارلايدى almaty-akshamy.kz ۆەدومستۆونىڭ سايتىنا سىلتەمە جاساپ.
«سوڭعى كەزدەرى ب ا ق پەن الەۋمەتتىك جەلىلەردە ارانداتۋشىلىق جانە جالعان ماتەريالداردى تاراتۋ جاعدايلارى جيىلەپ كەتتى. مۇنداي اقپاراتتىق حابارلار ۆاكسينالاۋ مەن بوسقىنداردىڭ كەلۋىنەن باستاپ، ءتىل ماسەلەسىنە دەيىنگى ءارتۇرلى تاقىرىپتاردى قامتيدى. جالعان جاريالانىمدار بولىپ جاتقان وقيعالاردى بۇرمالايدى، حالىقتى جاڭىلىستىرادى.
مىسالى، جەكەلەگەن ادامدار دارىگەرلەر مەن عالىمداردىڭ قۇزىرەتتى پىكىرلەرىن ەلەمەي، COVID-19 ۆاكسينالارىنىڭ قاۋىپتىلىگى مەن تيىمسىزدىگى تۋرالى نەگىزسىز جاريالايدى. كەيبىرەۋلەر كونستيتۋسيادا كەپىلدىك بەرىلگەن ازاماتتاردىڭ قۇقىقتارى مەن بوستاندىقتارىنا – شىعۋ تەگىنە، ۇلتىنا جانە تىلىنە بايلانىستى كەمسىتۋشىلىككە جول بەرىلمەيتىنىنە اشىق تۇردە قول سۇعادى.
سونىمەن قاتار اتالعان قۇقىقتار مەن بوستاندىقتاردى بۇزۋ جانە شەكتەۋ، كورىنەۋ جالعان اقپارات تاراتۋ قىلمىستىق كودەكستىڭ 145، 174، 274-باپتارى بويىنشا قىلمىستىق جاۋاپتىلىققا اكەپ سوعادى»، دەلىنگەن حابارلامادا.
باس پروكۋراتۋرا ازاماتتاردى زاڭنامانى مۇلتىكسىز ساقتاۋعا، ارانداتۋشىلىققا بوي الدىرماۋعا، جالعان حابارلامالارعا دەن قويماۋعا جانە رەسمي اقپارات كوزدەرىنە عانا سەنۋگە شاقىرادى.