بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» ق ر كونستيتۋسيالىق زاڭى ماقۇلداندى، دەپ حابارلايدى Almaty-akshamy.kz
ادىلەت ءمينيسترى قانات ءمۋسيننىڭ ايتۋىنشا، بۇعان دەيىن پارتيالىق تىزىمدەردە ايەلدەر مەن جاستاردىڭ 30 پايىزدىق كۆوتاسىن ساقتاۋ تۋرالى نورما ەنگىزىلگەن بولاتىن. وسىدان كەيىن مەملەكەت باسشىسى ەرەكشە قاجەتتىلىكتەرى بار ادامدارعا زاڭنامالىق قىزمەتكە قاتىسۋعا جاعداي جاساۋدى تاپسىردى.
«وسى تاپسىرمانى ىسكە اسىرۋ ماقساتىندا "سايلاۋ تۋرالى" كونستيتۋسيالىق زاڭعا ەنگىزىلەتىن وزگەرىستەر ازىرلەندى. وعان سايكەس، ايەلدەر، 29 جاسقا تولماعان جانە مۇگەدەك ادامدار ءۇشىن 30 پايىزدىق كۆوتادان بولەك، ماجىلىستە دەپۋتاتتىق مانداتتاردى ءبولۋ كەزىندە ولاردى ەسەپكە الۋ قاجەتتىلىگى بەكىتىلەدى»، - دەدى مۋسين.
دەپۋتاتتار بۇرىنعى ارىپتەسىنە بىرنەشە سۇراق قويدى. جاناربەك ءاشىمجان كانديداتتاردى ۇسىنۋ كەزىندە كۆوتانىڭ ساقتالاتىنىن، ال ءتىزىمدى بەكىتكەندە، ونداي مىندەتتى قالاي ورىنداۋ قاجەتتىگىن سۇرادى. مينيستر ءمۋسيننىڭ ايۋتىنشا، كانديداتتاردى تىركەۋ كۆوتاسى قاتاڭ ساقتالۋى قاجەت. ال ءاربىر ساياسي پارتيا كىمگە قانشا ورىن بەرىلەتىنىن ءوزى شەشەدى.
«ۇسىنىلىپ وتىرعان كونستيتۋسيالىق زاڭ جوباسى نىسانالى توپتارمەن ءارتۇرلى الاڭداردا قارالدى. جالپى العاندا، بۇل تۇزەتۋلەر ايەلدەردىڭ، جاستاردىڭ، ەرەكشە قاجەتتىلىكتەرى بار ادامداردىڭ ەلىمىزدىڭ زاڭ شىعارۋ ورگانىندا وكىلدىگىن كەڭەيتۋ ءۇشىن ماڭىزدى قادام بولىپ سانالاتىنىن اتاپ وتكەن ءجون. بۇل زاڭداردىڭ ساپاسىنا ءسوزسىز اسەر ەتەدى»، - دەدى ادىلەت ءمينيسترى.
تىزىمدە كۆوتالىق كانديداتتاردىڭ سانى ودان كوپ بولۋى دا مۇمكىن.
باسقا دەپۋتاتتار 30 پايىزدىق كۆوتادا ايەلدەر، جاستار مەن مۇگەدەكتەردىڭ ناقتى ۇلەسىن بەكىتۋدى ۇسىندى. سەبەبى ونداي تاجىريبە شەتەلدە بار. ادىلەت ءمينيسترى ونداي قاجەتتىلىك جوق دەپ سانايدى. ويتكەنى ءاربىر پارتيا ءوز ماقساتتارى مەن جوسپارىنا قاراي كۆوتالىق ورىندارىن رەتتەپ وتىرادى.
ءماجىلىس "قازاقستان رەسپۋبليكاسىنداعى سايلاۋ تۋرالى" قازاقستان رەسپۋبليكاسىنىڭ كونستيتۋسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى" كونستيتۋسيالىق زاڭنىڭ جوباسىن ماقۇلادى. وسىعان بايلانىستى ساياسي پارتيالار تۋرالى" زاڭعا دا وزگەرىس ەنگىزىلدى. ەكى قۇجات سەناتقا جولداندى.