پارتيا قۇرۋ ءتارتىبى ەداۋىر جەڭىلدەتىلىپ جاتىر.
پرەزيدەنتتىڭ پارتيادان شىعۋى ساياسي باسەكەلەستىكتى ارتتىرادى، بارلىق پارتيالاردىڭ دامۋى ءۇشىن تەڭ جاعدايلار جاسايدى. بۇل تۋرالى كونستيتۋسيالىق كەڭەستىڭ اپپارات باسشىسى، كونستيتۋسياعا ەنگىزىلەتىن وزگەرىستەر مەن تولىقتىرۋلار جونىندە ۇسىنىستار دايىنداۋ بويىنشا جۇمىس توبىنىڭ مۇشەسى باقىت نۇرمۇحانوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقازىر جوبادا پرەزيدەنت ساياسي پارتيادان شىعادى دەپ كورسەتىلگەن. مەملەكەت باسشىسى كونستيتۋسيالىق رەفورمادان بۇرىن پارتيادان شىقتى. بۇل ءوز كەزەگىندە ساياسي باسەكەلەستىكتى ارتتىرادى. بولاشاقتا ساياسي پارتيالار تۋرالى زاڭعا دا وزگەرىستەر ەنگىزىلەدى. ساياسي پارتيا قۇرۋ ءتارتىبى ەداۋىر جەڭىلدەتىلىپ جاتىر. سوندىقتان ساياسي ارەنادا جاڭا ساياسي كۇشتەر پايدا بولىپ، وكىلدى ورگانداردا جاڭا دەپۋتاتتار سايلانۋى ىقتيمال»، - دەدى باقىت نۇرمۇحانوۆ ورتالىق كوممۋنيكاسيالار قىزمەتىندە.
بۇدان بۇرىن حابارلانعانداي، بيىل جولداۋدا مەملەكەت باسشىسى قاسىم-جومارت توقايەۆ پرەزيدەنت ءوزىنىڭ وكىلەتتىگىن اتقارۋ كەزەڭىندە پارتياعا مۇشەلىگىن توقتاتا تۇرۋعا مىندەتتى ەكەنىن زاڭ جۇزىندە رەسىمدەۋدى ۇسىندى.
بيىل ءساۋىر ايىندا AMANAT پارتياسىنىڭ ءتوراعاسى رەتىندە پرەزيدەنتتىڭ وكىلەتتىگى توقتادى.
«مەن بۇعان دەيىن پارتيا ءتوراعاسى لاۋازىمىنان بوساپ، ۇيىم قاتارىنان شىعاتىنىمدى ايتتىم. وسى ۇيعارىمدى جۇزەگە اسىراتىن كەز كەلدى. بۇگىننەن باستاپ AMANAT پارتياسىنىڭ ءتوراعاسى رەتىندە وكىلەتتىگىمدى توقتاتىپ، پارتيادان شىعۋ تۋرالى شەشىم قابىلدادىم. بۇل قادامنىڭ سيمۆولدىق ءمانى بار. وسى ورايدا پرەزيدەنت سايلاۋىندا ماعان سەنىم ارتىپ، قولداعاندارىڭىز ءۇشىن بارشاڭىزعا العىسىمدى ايتقىم كەلەدى. سونداي-اق جاۋاپتى ساتتە پارتيا تىزگىنىن سەنىپ تاپسىرعاندارىڭىز ءۇشىن ريزاشىلىعىمدى بىلدىرەمىن»، - دەدى مەملەكەت باسشىسى.