قازاقستاندا سوڭعى بىرنەشە جىلدا ۇلدار مەن قىزدار اراسىنداعى تۋۋ ستاتيستيكاسىندا وزگەرىستەر بايقالۋدا. ۇلتتىق ستاتيستيكا بيۋروسىنىڭ مالىمەتتەرىنە سايكەس، بيىلعى جىلدىڭ العاشقى توعىز ايىندا ۇلداردىڭ سانى قىزدارعا قاراعاندا 10 مىڭعا كوپ بولدى. وسىلايشا، قازاقستاندا ۇلدار قىزدارعا قاراعاندا كوبىرەك تۋىلۋدا، دەپ حابارلايدى aqshamnews.kz.
2024 جىلدىڭ قاڭتارىنان قىركۇيەك ايىنا دەيىن رەسپۋبليكا بويىنشا 278 698 نارەستە دۇنيەگە كەلدى، ولاردىڭ 144 015ء-ى ۇل بولسا، ال 134 683ء-ى قىز بولعان. بۇل دەرەكتەر بويىنشا، قازاقستاندا 100 قىزعا 105 ۇل سايكەس كەلەدى دەگەندى بىلدىرەدى. تولىقتىرساق، بيىل بەس مىڭنان استام ەگىزدەر مەن جۇزگە جۋىق ۇشەمدەر دۇنيەگە كەلگەن.
دەموگرافيالىق ساراپشىلاردىڭ ايتۋىنشا، ۇلداردىڭ سانىنىڭ كوپ بولۋى، ەڭ الدىمەن، بيولوگيالىق فاكتورلارعا بايلانىستى بولسا دا، الەۋمەتتىك ماسەلەلەر دە ماڭىزدى ءرول اتقارادى. ستاتيستيكا بويىنشا، قازاقستاننىڭ تۇركىستان، ماڭعىستاۋ وبلىستارى جانە شىمكەنت قالاسى تۋىلعان بالالار سانى بويىنشا كوش باستاپ تۇر.
سونىمەن قاتار، ساراپشىلار ەر ادامداردىڭ جاستارىنىڭ وسۋىنە بايلانىستى كارىلىك كەزەڭىنە جاقىنداعاندا ايەلدەرگە قاراعاندا ءولىم كورسەتكىشى جوعارى ەكەنىن اتاپ ءوتتى.
"40 جاستان اسقان ەر ادامدار اراسىندا ءولىم دەڭگەيى قىزدارعا قاراعاندا جوعارى. بۇل اسىرەسە جۇرەك-قان تامىرلارى اۋرۋلارى، راك اۋرۋلارى، جول-كولىك وقيعالارى، ءوزىن-وزى ءولتىرۋ جانە كىسى ءولتىرۋ جاعدايلارىنا بايلانىستى"، – دەپ ءتۇسىندىردى ق ر ۇلتتىق ستاتيستيكا بيۋروسىنىڭ مامانى بيبىگۇل ميراسبەك.
قازاقستانداعى ەر ادامداردىڭ ءولىمىنىڭ جوعارى دەڭگەيى ولاردىڭ دەنساۋلىعىنا قاتىستى ءبىرقاتار ماسەلەلەردى، سونىڭ ىشىندە جۇرەك-قان تامىرلارى اۋرۋلارى مەن قاتەرلى ىسىكتەردى قامتيدى. بۇل الەۋمەتتىك جاعدايلار مەن سالاماتتى ءومىر سالتىنىڭ ماڭىزدىلىعىن كورسەتەدى.