الماتى قالاسى مەن شقو-نىڭ تاۋلى ايماقتارىندا شامامەن 2 مىڭعا جۋىق قار ۇستايتىن قالقاندار قويىلدى.
قازاقستاندا قار كوشكىنى قاۋپىنە قاتىستى جاعداي قۇزىرلى ورگانداردىڭ باقىلاۋدا. تولىعىراق توتەنشە جاعدايلار ءبىرىنشى ۆيسە-مينيسترى يبراگيم كۇلشىمبايەۆ ايتىپ بەردى، دەپ حابارلايدى Almaty-akshamy.kz.
«قىس تۇسكەلى ماسساسى 55 مىڭ تەكشە مەتردەن اساتىن 57 تابيعي قار كوشكىنى تىركەلدى. اتاپ ايتقاندا، الماتى قالاسى، الماتى وبلىسى جانە شقو اۋماعىندا. قاۋىپسىزدىكتى قامتاماسىز ەتۋ ماقساتىندا «قازسەلدەنقورعاۋ» مەملەكەتتىك مەكەمەسى جالپى كولەمى 250 مىڭ تەكشە مەتر قولدان (پروفيلاكتيكالىق شارا) 74 قار كوشكىنىن جاسادى. زارداپ شەككەندەر جانە ادام شىعىن جوق»، - دەدى يبراگيم كۇلشىمبايەۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، قار كوشكىنە قاتىستى جاعداي مينيسترلىكتىڭ باقىلاۋىندا.
«قار كوشكىنى جاعدايىن باقىلاپ، باعالايتىن جانە ءقاۋىپ تونگەن جاعدايدا ەسكەرتەتىن قىزمەت جۇمىس ىستەپ تۇر. الماتى قالاسى مەن شقو-نىڭ تاۋلى ايماقتارىندا شامامەن 2 مىڭعا جۋىق قار ۇستايتىن قالقاندار قويىلدى. سونىمەن قاتار ۋچاسكەلەردە اقپاراتتىق جانە ەسكەرتۋ بەلگىلەرى ورناتىلعان»، - دەگەن اقپارات بەردى ءمينيستردىڭ ورىنباسارى.
تجم دەرەگىنشە، قار كوشكىنى جۇمىسىنا 112 مامان جانە 56 بىرلىك تەحنيكا جۇمىلدىرىلدى.
ايتا كەتەيىك، ەلىمىزدە تاۋعا ساياحاتتاۋدى ۇناتاتىن تۋريستەرگە ارنالعان ءموبيلدى قوسىمشا ازىرلەنىپ جاتىر.