قوستاناي تۇقىمى جىلقىلارىن ساقتاپ قالۋ جۇمىستارىنىڭ ءبىرىنشى كەزەڭى اياسىندا «بايسەركە اگرو» حولدينگى اسىل تۇقىمدى ايعىرلارىن قوستاناي جىلقى زاۋىتىنا شاعىلىستىرۋ جانە ۇرىقتاندىرۋ ءۇشىن جەتكىزىپ بەرەدى.
ايعىرلار - 10 جاسار كۋمير مەن 8 جاسار تريۋمف الداعى اسىلداندىرۋ ماۋسىمىندا قوستاناي جىلقى زاۋىتىندا بولادى. سودان كەيىن بەلگىلى مەرزىمنەن كەيىن كەرى قايتارىلادى. جىلقىلار ەۋروپادان كەلگەن تاڭداۋلى جۇيرىك اتتاردىڭ ۇرپاقتارى جانە الماتى وبلىسىنداعى «قوبىلاندى» جىلقى زاۋىتىنا تيەسىلى. ولاردى قوستانايعا جىبەرەر الدىندا عالىمدار مۇقيات ىرىكتەۋ جۇرگىزىپ، قوستاناي تۇقىمىنا ەڭ ۇقساس كۇرەڭ ءتۇستى، اياعى مەن ماڭدايىندا اق داقتارى بار ەكى ايعىردى تاڭدادى. ايعىرلاردىڭ كومەگىمەن اسىل تۇقىمدى وزەك بولىپ تابىلاتىن قوستاناي تۇقىمىنىڭ 34 باس بيەسىن ۇرىقتاندىرۋ جوسپارلانۋدا، دەپ حابارلايدى اlmaty-akshamy.kz.
«قازاق تۇلپارىنىڭ» مال شارۋاشىلىعى مامانى ۆيتاليي گوفماننىڭ ايتۋىنشا، ايعىرلار الدىمەن بەيىمدەلۋ جانە جۇپتاۋعا دايىندىق كەزەڭىنەن وتەدى. سونان سوڭ ءساۋىر ايىندا جۇپتاستىرۋ جوسپارلانعان. جۇپتار تۇقىم ستاندارتىنا قول جەتكىزۋ ءۇشىن سىرتقى ءتۇرى مەن كەلبەتىنە قاراي تاڭدالادى. تاڭدالعان جۇپتار كەلەسى جىلدىڭ ءساۋىر-مامىر ايلارىندا تولدەيدى دەپ كۇتىلۋدە.
وسى رەتتە «قوبىلاندى» جىلقى زاۋىتىنا گەنەتيكالىق ماتەريالدى كوشىرۋ ءۇشىن قوستاناي تۇقىمىنىڭ رابات اتتى ۇلگىلى ايعىرى جىبەرىلدى.
«قوبىلاندى» جىلقى زاۋىتىنىڭ وكىلى ۆاسيليي مەلنيكوۆ اتاپ وتكەندەي، وعان قوستانايلىق جىلقىلار توبىمەن شاعىلىستىرۋ ءۇشىن 10 اسىل تۇقىمدى بيە دايىندالعان. ول ءۇشىن اسىلداندىرۋ باعدارلاماسى ازىرلەندى.
كەلىسىم اياسىندا «بايسەركە اگرو» اگروحولدينگى قوستاناي جىلقى زاۋىتىنىڭ قورالارىن جوندەۋ مەن جايلاستىرۋدى ءوز موينىنا الادى.
وتكەن جىلى «ۇاعبو» كەاق، «قازاق تۇلپارى» ج ش س جانە «بايسەركە اگرو» اراسىندا قوستانايلىق جىلقى تۇقىمىن ساقتاپ قالۋ جانە كوبەيتۋ بويىنشا بىرلەسكەن ىنتىماقتاستىق تۋرالى مەموراندۋمعا قول قويعان بولاتىن.
بۇل جۇمىس ەلىمىزدىڭ پرەزيدەنتى قاسىم-جومارت توقايەۆتىڭ ۇلتتىق جىلقى مەن تازى تۇقىمىن جاڭعىرتۋ بويىنشا تاپسىرماسى اياسىندا جۇزەگە اسىرىلۋدا.
قوستاناي جىلقى تۇقىمى – قازاقتىڭ مامانداندىرىلعان سپورت تۇرلەرىنىڭ جالعىز جىلقى تۇقىمى جانە ۇلتتىق ات سپورتىن دامىتۋ ءۇشىن كەڭىنەن قولدانىلادى. ول 1951 جىلى قوستاناي، مايكولسكيي جانە ترويسكيي (رەسەي) جىلقى زاۋىتتارىندا قازاق تۇقىمدى بيەلەردى قالماق، دون، سترەلەسكايا، ورلوۆ-راستونچينسكايا، اعىلشىن-اراب جانە اسىل تۇقىمدى شاباندوز ايعىرلارىمەن شاعىلىستىرۋ ارقىلى ءوسىرىلدى.
بۇل تۇقىمنىڭ جىلقىلارى جوعارى ەڭبەك قاسيەتتەرىمەن – كۇشتىلىگىمەن، توزىمدىلىگىمەن ەرەكشەلەنەدى جانە قازاقستاننىڭ كليماتىنا بەيىمدەلگەن.
ايتا كەتەيىك، بۇل ەرەكشە جىلقى تۇقىمى ءقازىر جويىلۋ الدىندا تۇر. قازىرگى تاڭدا اسىل تۇقىمدى كىتاپتا 200-دەن اسپاسا، «قازاق تۇلپارى» جىلقى زاۋىتىندا (قوستاناي جىلقى زاۋىتى) 48ء-ى عانا بار.