قانت قىزىلشاسى القابىن 60 مىڭ گەكتارعا دەيىن ۇلعايتۋ جوسپارلانىپ وتىر.
قازاقستان ۇكىمەتى قانت تاپشىلىعى ماسەلەسىن شەشۋ ءۇشىن، قانت قىزىلشاسى القابىن ۇلعايتۋدى كوزدەپ وتىر. بۇل تۋرالى اۋىل شارۋاشىلىعى مينيسترلىگىنىڭ باسپا ءسوز قىزمەتى مالىمدەدى، دەپ حابارلايدى Almaty-akshamy.kz
اۋىل شارۋاشىلىعى ءمينيسترىنىڭ ورىنباسارى ءابىلحايىر تامابەك جامبىل وبلىسىنىڭ مەركى، جامبىل، بايزاق جانە تالاس اۋداندارىنا بارىپ، جەرگىلىكتى شارۋالارمەن كەزدەستى. ۆيسە-مينيستر قانت قىزىلشاسىن وسىرۋمەن اينالىساتىن شارۋالاردىڭ پروبلەمالارى مەن ۇسىنىستارىن تىڭدادى.
ايتا كەتەرى، جامبىل وبلىسى – قازاقستانداعى قانت قىزىلشاسىن وسىرەتىن نەگىزگى وڭىرلەردىڭ ءبىرى. ءونىمدى قايتا وڭدەۋ بويىنشا وندىرىستىك قۋاتتار دا وسى وڭىردە ورنالاسقان.
وبلىس اكىمدىگىنىڭ دەرەگىنشە، 2022 جىلى قانت قىزىلشاسىنىڭ ەگىس الاڭى 6،1 مىڭ گا بولدى، بىلتىر ەگىس الاڭى 5،6 مىڭ گا قۇراعان. 2017-2021 جىلدار ارالىعىندا قانت قىزىلشاسىنىڭ كوپجىلدىق ءوندىرىسىنىڭ ورتاشا كولەمى شامامەن 171،0 مىڭ توننانى قۇرادى.
دالىرەك ايتقاندا، 2017 جىلى – 206،1 مىڭ توننا، 2018 جىلى – 192،9 مىڭ توننا، 2019 جىلى – 162،2 مىڭ توننا، 2020 جىلى – 133،5 مىڭ توننا، 2021 جىلى – 160،3 مىڭ توننا.
قانت قىزىلشاسى القابىنىڭ ازايۋىنا شىعىننىڭ كوپتىگى مەن ەكونوميكالىق تيىمسىزدىگى (تومەن رەنتابەلدىلىك)؛ ىلعالمەن قامتاماسىز ەتۋ پروبلەماسى؛ شارۋالاردى تەحنيكالىق جابدىقتاۋ ماسەلەسى سەبەپ بولعان.
ماسەلەن، 1 گەكتار قانت قىزىلشاسىن سەبۋگە جۇمسالاتىن تىكەلەي شىعىن ورتا ەسەپپەن 500 مىڭ تەڭگەنى قۇرايدى. جانار-جاعار ماي، پەستيسيدتەردىڭ قىمباتتاۋىنا جانە سۋاراتىن سۋ ءتاريفىنىڭ وسۋىنە بايلانىستى شارۋالار شىعىنعا ۇشىراپ جاتىر.
سونداي-اق وتكەن عاسىردىڭ 30-شى جىلدارى سالىنعان قانت زاۋىتتارى ابدەن توزعان. زاۋىتتاردىڭ تەحنولوگيالىق جابدىقتارىن جاڭعىرتۋ ءۇشىن كوپ ينۆەستيسيا قاجەت.
«فەرمەرلەردىڭ پروبلەمالارى مەن ۇسىنىستارىن نازارعا الا وتىرىپ، اۋىل شارۋاشىلىعى مينيسترلىگى قانت سالاسىن جاڭعىرتۋ جوسپارىن پىسىقتاپ جاتىر»، - دەپ مالىمدەدى ۆەدومستۆو.
جوسپاردا مىناداي تارماقتار قاراستىرىلعان:
جاڭا سۋارمالى جەرلەردى ىسكە قوسۋ ەسەبىنەن قانت قىزىلشاسىنىڭ ەگىس الاڭدارىن كەڭەيتۋ ارقىلى شيكىزات بازاسىن 60 مىڭ گەكتارعا دەيىن ۇلعايتۋ؛
قانت سالاسىن مەملەكەتتىك رەتتەۋ جانە قولداۋ شارالارىن كۇشەيتۋ؛
قانت قىزىلشاسىن قايتا وڭدەۋ بويىنشا قولدا بار قۋاتتاردى تەحنيكالىق جانە تەحنولوگيالىق قايتا جاراقتاندىرۋ، قانت زاۋىتتارىن سالۋ جانە جاڭعىرتۋ؛
سۋ ۇنەمدەۋ تەحنولوگيالارىن ەنگىزۋ؛
تۇقىم شارۋاشىلىعىن دامىتۋ.
ەسكە سالساق، 14 شىلدەدە ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ بۇرىن ىسكە قوسىلعان جەتى قانت زاۋىتىنىڭ تورتەۋى عانا – الماتى جانە جامبىل وبلىستارىندا جۇمىس ىستەيتىنىن ايتتى. ولاردىڭ جۇكتەمەسى تەك 31%ء-تى قۇرايدى. ال قازاقستان يمپورتتىق قانتقا 90 پايىز تاۋەلدى.
مەملەكەت باسشىسى ەلدەگى قانت تاپشىلىعى ءۇشىن اۋىل شارۋاشىلىعى ءمينيسترى ەربول قاراشوكەيەۆ پەن ساۋدا جانە ينتەگراسيا ءمينيسترى باقىت سۇلتانوۆقا سوگىس جاريالادى.